Редактор

Редактор

22.02.2018 14:50

Вăрçăра панă орденсем 74 çултан тупăннă

(Ирина Трифонова, К.Малышев сăнӳкерчӗкӗ) Тăван Çӗршывăн хӳтӗлевçисен кунӗ умӗн, февралӗн 22-мӗшӗнче Хусанта малтан С.Сайдашев ячӗллӗ Пысăк концерт залӗнче чаплă  мероприяти иртрӗ, Хӗç-пăшал çарӗсен ветеранӗсене, генералсемпе офицерсене, мичмансемпе прапорщиксене, салтаксене çитес уявпа саламларӗç тата Аслă вăрçăра пуç хунисене аса илсе тăванӗсене çухалнă наградисене тавăрса пачӗç. Мероприятие ТР Президенчӗ Рустам Минниханов, ТР Патшалăх Пулăшуçи Минтимер Шаймиев, СССР Геройӗ Борис Кузнецов хутшăнчӗç.

Президент аллинчен халиччен РФ Оборона министерствинче упраннă ашшӗн наградисене Элмет районӗнчи Патраклăра пурăнакан Лидия Лисина та тивӗçрӗ. Унпа эпир Корстон комплексра тӗл пулса калаçрăмăр. Лидия Савельевна савăннине пытармарӗ, çапах хытă хумханни те палăрчӗ. Ара, çакăн пек пӗлтерӗшлӗ пулăмсем кашни кун пулмаççӗ.

  • Манăн атте Савелий Епифанович Антиков вăрçăран таврăнайман, 1944 çулта çӗршывшăн çапăçса пуç хунă. Аттене курман пулсассăн та, вăл та мана курман, пӗлмен пулсассăн та вăл хуть хăçан та ман пуçра, хам çумра çӳренӗ пек туйăннă, халь те çаплах. Атте мана çак куна çитиччен ăшă сывлăш парса, ӗçре пулăшса пынă пек. Вăл шкулта ӗçленӗ, ачасене юратни те мана унранах куçнă пек туйăнать. Эпир паян ун ӗçне тăсса пыратпăр, – терӗ Лидия Савельевна.

Çапла 74 çултан Савелий Антиковăн Аслă вăрçăра кăтартнă паттăрлăхӗшӗн панă наградисем – Хӗрлӗ Çăлтăр тата Тăван Çӗршывăн Аслă вăрçин I степеньлӗ орденӗсем тăванӗсем патне тинех çитрӗç.

 

 

22.02.2018 12:49

Хусанта кивӗ нуские çӗннипе улăштараççӗ

(Ирина Трифонова). Кун пекки те пулать иккен пурнăçра. Февралӗн 23-мӗшӗнче Хусанта пурăнакансем кивӗ чăлха-нускийӗсене çӗннисемпе улăштарма пултараççӗ. Çак кун хулара кивӗ тумтирпе пластмасс хупкăçсене пуçтарассипе #Экологичный Ягуар акци иртет. Кун пирки пире «Карта инициатив» проектăн обществăлла çыхăнусен енӗпе ертӳçи Айдар Зиннатуллин пӗлтерчӗ.

Экологи акцийӗн хӳттинче эпир кивӗ япаласене – тумтир, вырăн çитти-таврашӗ, пластмасс крышкăсем – пуçтаратпăр. Мероприяти Хусанăн сакăр районӗнче пулать, виççӗшӗнче стационарлă пунктсем ӗçлӗç. Унсăр пуçне кашни районта палăртнă вырăнта пӗрер сехет пулса кивелнӗ япаласем пуçтарăпăр, – пӗлтерчӗ эксперт.

Айдар Зинатуллин ăнлантарнă тăрăх, кивӗ, анчах тăхăнма юрăхлă япаласене каярахпа фримаркетсенче салатӗç. Çакăн евӗр мероприятисем Хусанти креативлă идейăсен резиденцийӗнче тăтăшах иртеççӗ иккен. Тăхăнма юрăхсăр япаласене переработкăна ярӗç.

#Экологичный Ягуар акцие йӗркелекенсем – «Карта инициатив» тата «ЭкоЛогично» проектсен авторӗсем.

Экологи акцине хутшăнакансем валли сюрприз та хатӗрленӗ: кивӗ чăлха-нускисене çӗннипе улăштарӗç. 3 килограммран ытларах япала илсе килекенсене кинона кайма билет парӗç, ачасене пылак çимӗçпе сăйлама палăртнă.

Акци çак адрессемпе иртет:

10.00 – 11.00 – Киров районӗ, Петров паркӗ,
11.15 – 12.15 – Мускав районӗ, Урицки паркӗ,
12.30 – 13.30 – Авиастроительнăй районӗ, Ленин ячӗллӗ Культура çурчӗ çумӗнчи «Крылья Советов» парк,
13.45–14.15 – Çӗнӗ Савиново районӗ, «Марьино озеро» экопарк,
14.30 –15.30 – Вахитов районӗ, «Хура кӳлӗ» парк çумӗнчи Дзержинский урамӗ.

15.45 16.15 Советский районӗ, Аэропортовская,1 адреспа вырнаçнă Военком умӗнче, Патриса Лумумбы урамӗ çумӗнче.
16.30 17.30 Азино, Горкинско-Ометьевски вăрманӗн парковки, 
17.45
18.15 Приволжски районӗ, Проспект Победы метро умӗнчи Мухтав скверӗ.
 

 

22.02.2018 12:44

Мăнаçланатпăр хамăр Сергейпе

Манăн тăван Шупашкар,

Пӗчӗк юратнă çӗршывăм,

Эсӗ ман çăкăр-тăвар,

Сансăр ютра питӗ йывăр.

Çӗнӗ Шуçăм районӗнчи Чăваш Шупашкар ялӗнче çуралса ӳснӗ, хальхи вăхăтра Анат Камăра пурăнакан Сергей Петрович Ермолаев çак уйăхра  60 çул тултарчӗ.

Сăвăç пулса çуралмаççӗ теççӗ те, анчах та Сергей пекки пирӗн ялта пӗрре. Ырă хӗвел ăшшипе, хӗвел шевли куллипе пӗтӗм чун-чӗререн çак уяв ячӗпе саламлас тетпӗр хамăр ентӗшӗмӗре. Чăваш юманӗ пек çирӗп сывлăх, телейлӗ вăрăм кун-çул, çемьере килӗшӳ, ӗçре ăнăçу сунатпăр. Пире малалла та нумай юрă-сăвăпа савăнтарасса шанатпăр.

Чăваш литературинче хăйсем хыççăн ырă ят хăварна чаплă сăвăç сахал мар. Константин Иванов, Çеçпӗл Мишши, Петӗр Хусанкай та тăван ялӗсем çинчен сахал мар илемлӗ йӗрке çырнă. Эпир Ермолаев пуррипе мăнаçланатпăр. Тайма пуç ăна, хамăр яла çӳлти шая çӗкленӗшӗн, пирӗн яла халалласа, ял-йыша сума суса сăвă-юрă çырса кӗнекесем кăларайнăшăн. Ял историйӗ çинчен кăна Сергей Петрович икӗ кӗнеке кăларнă. Тата та çырать. Пултарулăхӗ малалла та аталанса пытăр, творчествăра пысăк çитӗнӳсем тумалла пултăр.

Сергей Ермолаев миçе юрă-сăвă çырса кăларнине эпир шутласа та кăларас çук, юмахӗсене вуласан вара тӗлӗнмеллипех тӗлӗнетӗн: унăн «Уйăхпи» поэми «Нарспи» пекех çăмăллăн вуланать.

Сергей Петрович таланчӗ пӗр енлӗ кăна та мар, вăл мӗн пӗчӗкрен сăнӳкерчӗк тума юратнă. Хăй пурăннă Турчăка кассин ачисене, пӗрле вӗреннӗ юлташӗсене те нумай сăн ӳкернӗ. Халӗ вăл интереслӗ клипсем тăвать. Хăйӗн сăввисене юрă хывса гитарăпа каласа хитре юрлать.

Чăваш Шупашкар ялӗнче иртнӗ çулхи Ял кунӗнче сăвăсем каласа, юрă юрласа савăнтарчӗ. Хай çырнă кӗнекесене парнелесе хăварчӗ. Унăн сăвви-юрринчи кашни сăмах ял-йыша юратнă туйăмпа тулнă.

Эпир Сире ялта кӗтетпӗр –

Чăваш Шупашкар ялӗнче.

Эсир килсессӗн хӗпӗртетпӗр –

Хамăр поэт килнӗ тесе.

Чăваш Шупашкар ял çыннисем.

А.Наумов сăнӳкерчӗкӗ.

 

 

22.02.2018 09:42

Жириновский те чăваш кăçаттине тăхăнать

РФ Президенчӗ пулма хăйӗн кандидатурине тăратнă ЛДПР лидерӗ Владимир Жириновский халӗ Якути сиввисенчен хăрамасть, мӗншӗн тесен ӗнер вăл Мускаври ВДНХра Йӗпреç (Чăваш Ен) каччин Эдуард Марковăн кăçаттине туянчӗ.

Кăçатă йăвалас ăсталăх чăвашсен ӗмӗртен пырать. Чăвашенсем вара пӗтӗм Раççее кăçатăпа тивӗçтереççӗ тесен те юрать, акă ӗнтӗ миçе çул Мускава сутма çӳреççӗ. Туянаканăн кăмăлне тивӗçтерес тесе мӗнле кăна илемлетмеççӗ тата. Ассортимент та пуян: пысăккисем, ачасем валли вăрăм кăçатă, кăçатă калуш, пӳртре çӳремелли çемçе тапăчки... Йӗпреçри Марковсене те акă туянакан лайăх пӗлет, нумай çул Мускав пасарӗсенче сутаççӗ вӗсем. Вӗсен кăçаттисемпе çăлтăрсем те çӳреççӗ ӗнтӗ, халӗ акă Жириновскире те пур.

Эпатажлă политик ВДНХ территорийӗнче пыракан «Охота и рыболовство на Руси» халăхсем хушшинчи 43-мӗш куравӗнче ӗнер пулчӗ.

«Çӗршывра хуть ăçта та суту-илӳ тума пултаратăр. «Маçтăр» сăмах пулать вăл. Вăт маçтăрсене патент паратпăр та, кам та пулсан е мӗнле-тӗр рэкет пырса кăна пăхтăр», – терӗ вăл кăçатă сутакан Эдика яланхилле хӗрӳ. Халăх промысли енӗпе ӗçлекен производительсен налогне пӗтерессине асăнчӗ. Чăваш кăçаттисене ытарайман политик Э.Марков кăçаттисенчен пӗрне тăхăнсах пăхрӗ.

«Мӗнле çемçе, хуть мӗнле сивӗре те ăшă вӗт. Якутскра халӗ 72 градус сивӗ. Шартлама сивве тир пушмак та чăтаймасть... Çынсем кăçатă тăвасшăн – чăрмантараççӗ. Хăйӗн пысăках мар мастерскойӗ, пасарта сутма яланхи вырăнӗ пултăр, нимӗнле мафи те ан тӗкӗнтӗр. Суттăр вăл, ӗçлесе илтӗр укçине. Атту имӗш пур çӗрте те сăрă схема, теневая экономика. Пăхăр-ха калушӗ те пур тата. Каллех хамăрла ку... Ăçта-тăр юр ирӗлет-тӗк – калуш çăлать. Халӗ вӗт пирӗн 20 градус сивӗ. Чӗркесе парăр-ха», – терӗ  Жириновский сутуçа кăçатта чӗркесе пама ыйтса.

«Охота и рыболовство на Руси» Раççейре тата тӗнчере чи пысăк курав. Вăл çуллен февраль уйăхӗн вӗçӗнче пулать. ВДНХ экспозици тӳремӗнче сунар тата пулă тытмалли чи лайăх хатӗрсемпе аксессуарсене кăтартаççӗ, сутаççӗ унта.

 

 

21.02.2018 16:48

Теччӗсем шупашкарсем çине шанмаççӗ

Иван Яковлевич Яковлевăн 170 çулхи юбилейӗ теччӗсемшӗн уйрăмах пӗлтерӗшлӗ. Теччӗ çӗрне чапа кăларнă ентеше чыслассинче шупашкарсем çине шанмаççӗ вӗсем. Юбилей мероприятийӗсен анлă программине хатӗрленӗ. Сăмах май, ăна пуçларӗç те ӗнтӗ. Вырсарникун Çармăс ялӗнче «Теччӗ шевлисем» фестиваль ирттерчӗç, хальхи вăхăтра районти чăваш ялӗсенчи вӗрентекенсемпе библиотекарьсен конкурса хатӗрленеççӗ. Мартăн 20-мӗшӗнче кунта электронлă презентацисен «Аслă вӗрентекенӗмӗр» конкурсӗ пулать. Ăна Иван Яковлевич Яковлев 170 çул тултарнине халалланă. Ку конкурса та Теччӗ районӗнчи ЧНКЦ йӗркелет.

Вӗрентекенсемпе библиотекарьсене аса илтеретпӗр, ӗçсене (вырăсла та юрать) март уйăхӗн 20-мӗшӗччен Теччӗ хули, Ленин урамӗ, 92-мӗш çурт (Туслăх çурчӗ) ярса памалла. Тӗплӗнрех 8-937-289-18-94, 8-996- 952-36-39 телефонпа ыйтса пӗлме пулать.

 

 

21.02.2018 16:13

Эй, пӗчӗкçӗ чăваш, кăтарт хăвна!

Февралӗн 15-мӗшӗнчен пуҫласа апрелӗн 1-мӗшӗччен Чӑваш чӗлхин инҫет вӗренӳ центрӗ «Эпӗ пӗчӗкҫӗ чӑваш – 2018» видеоконкурс ирттерет. Конкурса йӗркелесе ирттерме пулăшакансен йышӗнче – Атнер Хусанкай ӑсчах тата Николай Ишентей сӑвӑҫ.

Ачасен пултарулăхне 7 номинацире хаклӗç: «Эпӗ пӗчӗкҫӗ чӑваш: ача-пӑча сӑввисем» (шкул ҫулне ҫитменнисем валли); «Эпӗ пӗчӗкҫӗ чӑваш: ача-пӑча вӑййисем»; «Эпӗ пӗчӗкҫӗ чӑваш: ача-пӑча юррисем»; «Эпӗ пӗчӗкҫӗ чӑваш: пуҫламӑш класс сӑввисем»; «Эпӗ пӗчӗкҫӗ чӑваш: Митта Ваҫлей сӑввисем»; «Эпӗ пӗчӗкҫӗ чӑваш: Николай Ишентей сӑввисем»; «Эпӗ пӗчӗкҫӗ чӑваш: чи лайӑх видео».

Сӑвӑ вулакансен http://pecekse.chuvash.orgсайтра регистрациленмелле, ӳкермелли хайлава суйласа илмелле. Юрлакансен уйрӑм майпа ҫырӑнмалла — хӑйсен заявленийӗсене вӗсен  Этот e-mail адрес защищен от спам-ботов, для его просмотра у Вас должен быть включен Javascript  электронлă адреспа ярса памалла.

21.02.2018 13:10

Ахаль çынсем пӗр-пӗрне ытларах ăнланаççӗ

(Ирина Трифонова). Февралӗн 18-мӗшӗнче Хусанти Туслăх çуртӗнче Тăван чӗлхе кунне палăртрӗç. Нумай нациллӗ вырсарни шкулӗ ку хутӗнче тимлӗхе Украинăн паллă поэчӗн тата художникӗн Тарас Шевченкон творчествипе кун-çулне тимлӗхе илчӗ. Яланхи пекех вырсарни шкулӗн кашни уйрăмӗ поэтăн сăввисене хăйӗн тăван чӗлхи çине куçарса вуласа пачӗ.

Украинсен наципе культура автономийӗ мероприятие тӗплӗн хатӗрленнӗ, активист­семсӗр пуçне вырсарни шкулне çӳрекен ашшӗ-амăшӗсем те хутшăнчӗç. Хăшӗ курав йӗркелеме пулăшнă, тепри каравай пӗçерсе килнӗ. «Вербиченька» украинсен юлташлăхӗн ертӳçи Евгений Савенко Тарас Шевченкон пурнăçӗ çинчен питӗ интереслӗ каласа пачӗ. Поэтăн шăпи чăнах та тумхахлă, ачаран нумай йывăрлăх тӳсме тивнӗ ăна. Телее, пурнăçӗнче сахал мар ырă çын тӗл пулнă. Санкт-Петербургра пурăннă вăхăтра Сташенко студент ăна ăнсăртран урамра ӳкернӗ вăхăтра асăрхать. Ку вăхăтра Тарас Шевченко крепостной хресчен шутӗнче пулнă-ха. Сташенко çамрăк çыннăн пысăк пултарулăх пуррине курса ăна помещикрен туянма шутлать. Çапла ентешӗсем тăрăшнипе Тарас Шевченкона 1838 çулта ирӗке кăлараççӗ. Шăп çак пулăма халалласа ирттерчӗ те ӗнтӗ Тăван чӗлхе кунне Нумай нациллӗ вырсарни шкулӗ.

Тӗнче литературине кӗнӗ хайлавсене кашни халăх хăй еткерӗ вырăнне йышăнать, çав шутра Тарас Шевченкон сăввисемпе ӳнер ӗçӗсене те. Сăмах май, Шевченко хăйне художник тесе шутланă, сăввисене чун туртнипе çырнă. Халăх вара ăна чи малтан поэт вырăнне хурса хаклать. Тарас Шевченкон сăввисене чăвашла куçарнă май, вăл кăмăлӗпе çирӗп, чунӗпе вара йăваш пулни палăрчӗ. Сăввисенче тăван çынсемпе тăван тавралăха чунтан юратни курăнать. Куçарнă чух чи кирли – сăвă интонацине упраса хăварасси. Вăл поэтăн сăвă çырнă чухнехи эмоцийӗсемпе туйăмӗсене палăртать. Ку йывăрах та пулмарӗ. Унăн сăввисен кӗвви тӗлӗнмелле майпа чăвашсеннипе пӗр килсе тăрать. Лирики чăваш поэчӗсенне çывăх.

Паллах, Нумай нациллӗ вырсарни шкулӗн пӗр мероприятийӗ те чăваш уйрăмӗ хутшăнмасăр иртмест. Унăн ертӳçи Сильвия Чаркина каласа панă тăрăх, тăван чӗлхе кунне вӗсем тахçанах хатӗрленме пуçланă.

– Пӗлтӗр, астăватăр пулӗ, тăван чӗлхе кунне чăваш халăх поэчӗн Петӗр Хусанкайăн 100 çулхи юбилейне халалларăмăр. Мӗнлерех хитре те чаплă ирттерсе ятăмăр ăна. Вырсарни шкулӗн кашни уйрăмӗ унта хастар хутшăнчӗ. Хамăр та нихăçан та айккинче юлмастпăр. Эпир кунта пӗр çемьери пек пурăнатпăр, ют уявсем пирӗншӗн çук, – терӗ Сильвия Чаркина.

Тарас Шевченкон чăвашла сăввисене «Аталан» пӗрлӗхӗн активисчӗсем – Алена Гордеева, Анастасия Ильина, Наталья Кукушкина питӗ илемлӗ вуласа пачӗç.

Тӗрӗс, Украинăпа Раççей хутшăнăвӗсем паян кăткăс лару-тăрура пулсан та, ахаль çынсем пӗр-пӗрне ытларах ăнланаççӗ. Хусанти Туслăх çуртӗнче иртнӗ мероприяти те çавнах çирӗплетет.

 

21.02.2018 13:05

Юбилей Димитровградран пуçланчӗ

(Елена Мустаева. Автор сăнӳкерчӗкӗ). Ульяновск облаçӗнче И.Я.Яковлев çуралнăранпа 170 çул çитнипе çыхăннă мероприятисен ярăмӗ нарăсăн 4-мӗшӗнче Димитровградра тытăнчӗ.

 «Восход» Культура керменӗнче чăваш уявӗ пулни фойене кӗрсенех палăрчӗ: тӗрлӗ куравсем йӗркеленӗ, сӗтелсем çинче чăваш апат-çимӗçӗ йăтăнса ларать, фольклор ушкăнӗсем килекенсене çăкăр-тăварпа кӗтсе илеççӗ...

Чăвашсен уявне Сергей Морозов кӗпӗрнаттăр, облаçри искусствăпа культура политикин министрӗ Ольга Мезина килсе çитрӗç. Вӗсем чи малтан куравсемпе паллашрӗç, вырăнти наципе культура автономийӗсен председателӗсемпе тӗлпулу ирттерчӗç, хальхи вăхăтра çивӗч тăракан ыйтусене çӗклерӗç. Çав шутра Димитровградри 10-мӗш шкула тӗпрен юсанă хыççăн И.Я. Яковлев ятне парассине те, хулара Туслăхсен çуртне уçассине те. Сцена çинчен Сергей Морозов пухăннисене облаçри, Раççейри патшалăх влаçӗ ячӗсенчен Чăваш культура кунӗ ячӗпе саламларӗ.

– Раççейӗн тӗп хӗç-пăшалӗ – халăхсен, тӗн конфессийӗсен хушшинчи туслăх. Пирӗн тӗллев – çав туслăха сыхласа, çирӗплетсе вăйлă, çынсене телейлӗ пурăнмалли регион туса хурасси. Чăваш çынни регионти пур тытăмра та вăй хурать, çак аслă халăхран тухнă çынсем пирӗн регион чапне, сумне ӳстереççӗ. Тăван çӗршывăн Аслă вăрçинче Совет Союзӗн Геройӗ ятне 7 чăваш илнӗ, пӗри Мухтав орденӗн тулли кавалерӗ пулнине манмалла мар. И.Я. Яковлев çуралнăранпа 170 çул çитнине палăртнă май çакна каласшăн: вăл Чӗмпӗр çӗрӗ çинче чăн-чăн педагог пулса тăнă, 150 çул каялла Атăлçи тăрăхӗнчи халăхсене çутта кăларакан центр йӗркеленӗ. Çакă чăваш чӗлхин хăйне евӗрлӗхне, чăваш этнонимне сыхласа хăварма пулăшнă, чăваш çырулăхӗ те пирӗн регионтах çуралнă. Эпир – Яковлевăн лайăх вӗренекенӗсем. Çирӗм çул ытла Чăваш наципе культура автономийӗ унăн ӗçне çӳллӗ шайра илсе пырать. Олег Мустаев пирӗн правительствăпа тачă ӗçлет, вăл чăн-чăн ертӳçӗ, халăх хушшинче авторитечӗ пысăк, унăн нумай çӗнӗ шухăш, – терӗ Сергей Иванович.

Кӗпӗрнаттăр хăйӗн сăмахӗнче «Канаша» пысăк тимлӗх уйăрчӗ, вăл чăваш хаçачӗн кашни номерне тимлӗ пăхнине, журналистсен ӗçне хакланине палăртрӗ.

Чăваш культура кунӗ чăннипех халăхсен туслăхне вăйлатакан уяв пулса тăнине çирӗплетекен тепӗр пулăм – Димитровградри тӗрлӗ халăхсен автономийӗсен председателӗсем чăвашсене саламлама пыни. Сцена çинчен тутар, мордва, украин, армян, азербайджан, таджик чӗлхисемпе саламсем янăрарӗç, вӗсем хăйсен ырă сунăмӗсене кашни чăваш патне çитерме тăрăшрӗç.

21.02.2018 11:55

Пур камран тӗслӗх илмелли

Миçе кун иртсе кайрӗ пулсан та ун хыççăн, вырсарникунранпа Çармăс ялӗнчи чăваш культурин фестивалӗ пирки шухăшласа çӳретӗп.
Теччӗ тăрăхӗнчи демографи лару-тăрăвӗ юлашки çулсенче савăнтармасть пулин те, çак фестивальте çын сахалли пӗртте туйăнмарӗ. Çынсем кашни чăваш ялӗнчен йышлăн пухăнса килнӗ. Тумӗсем те капăр, юррисем те тӗрлӗрен. Районти чăвашсем аслă вӗрентекенӗмӗр Иван Яковлевич Яковлев çуралнăранпа 170 çул çитнине уявлама хатӗрленме хӗллех пуçланине сисрӗмӗр. Тата Теччӗ районӗ юлашки çулсенче туризма вăйлă аталантарнине шута илсен, Атăлпа ишекен туристсем малашне чăваш ялӗсене курма та çитме пултарасса шанăç пур. Вӗсене кӗтме вара этноушкăнсем кирек хăш ялта та хатӗрленсех тăраççӗ.
Районти чăваш центрӗн пуçарăвӗпе фестиваль иккӗмӗш хут иртет. Çармăс ялӗсем чăннипе те килӗштернӗ пулӗ çак юрă-ташă уявне, зала лăк-тулли куракан халăх пуçтарăннă. Ларма та вырăн çук. Пултăр тесех тăвас тенӗ пулӗ ăна Володар Тимофеевăн команди. Районти чăвашсен культурине сăнлакан пӗр пысăк мероприятие хальлӗхе общественниксем хăйсен вăйӗсемпе ирттереççӗ.
Жюрире Юрий Сиякинсăр пуçне Маргарита Адайкина музыка вӗрентекенӗ, Ирина Волкова РДК методисчӗ, Ольга Илларионова юрăç, Светлана Митяшовăпа Альбина Харитонова – Теччӗ районӗнчи ЧНКЦ Канашӗн пайташӗсем. Каласа хăвармалла, Çармăс ялӗнчи Культура çурчӗн ӗçченӗсен Василий Караевпа Нина Османован тăрăшăвӗпе сатурлăхне кура асăннă юрăпа ташă фестивалӗ чăн чăн пултарулăх уявне çаврăнчӗ.

Сцена çине тухакансене 6 номинаципе хакларӗç. «Эстрада юррине ушкăнпа» юрлассинче Çӗньялти «Çӗмӗрт», Шанчăри трио, Хупкӗперти «Чечек», Районти культура керменӗ çумӗнчи «Шуçăм», Çармăсри «Салам» вокал квартечӗ тупăшрӗç. «Эстрада юррине пӗччен» юрлассинче Ăнăри Елена Савельева, Шанчăри Вера Шумилова, Починкири Сергей Ефимов, Çармăсри Ирина Ванямовăпа Наталья Паймякова, Юккелӗнчи Нина Матвеева, Кăнна Кушкинчи Татьяна Резюкова вăй виçрӗç. «Халăх юррине ушкăнпа» юрлассинче Чакăлтăмри «Пилеш», Çармăсри «Çӗмӗрт», Ăнăри «Туслăх» ăмăртрӗç. «Ушкăнпа ташласси» номинацие Шанчăри «Çамрăклăхпа» Хупкӗперти «Чечек» кăна пайларӗç. «Ачасен юрри» номинацшӗн Хупкӗперти Кристина Шумилкина, Ăнăри Полина Татариновăпа Милена Чубукова, Пухтелӗнчи Наталья Евдокимова тата Шанчăри Екатерина Хохловăпа Анастасия Дмитриева дуэчӗ кӗрешрӗç.

«Халăх юррине пӗччен» номинацире кăçал Шанчăри Вера Шумилова кăна пулчӗ. Унта вăлах 1-мӗш вырăна йышăнчӗ те. Эстрада юррине ушкăнпа юрласа Теччӗри «Шуçăм» çӗнтерчӗ, эстрада юррине пӗччен юрласа Ефимов Сергей. Ушкăнпа ташă ташлассинче Шанчăри «Çамрăклăх» çӗнтерчӗ. Ачасен хушшинче юрласа Милена Чубукова мала тухрӗ.

Жюри шучӗпе, халăх юррисене юрлассинче Чакăлтăм ялӗнчи «Пилеш» ансамбле çитекенни çукчӗ.
Теччӗсенчен тӗслӗх илмелли пур çӗпрелсен те пăвасен те. Çитсе çул Çармăса асăннă районсен ушкăнӗсемпе уйрăм юрлаканӗсене те чӗнесшӗн фестивале йӗркелекенсем. Çак ӗçе хакласа грант парсанччӗ тата вӗсене! 

21.02.2018 10:50

Кивӳсел помидорӗ пур чух Турцин кирлӗ мар

(Ирина Кузьмина). Аксу районӗнчи Кивӗ Ӳсел ял хутлăхӗнче пурӗ 7 фермер хуçалăхӗ, вӗсенчен Геннадий Николаевич Петрушков кăна пахча çимӗç ӳстерет. Виçӗм çул 1,5 миллион тенкӗ грант выляса илсен теплицăсем лартнă вăл. Халӗ 18 сотăй лаптăкра унăн 3 теплица. Тӗпрен илсен, помидор ӳстерессипе ӗçлет. Ку ӗçре Геннадий Николаевича ас тесен те юрать. Помидор калчисене мӗн çитнипе çитменнине çулçине пăхсах уйăрать вăл. Фермер çӗнӗ технологисене шута илсен те, ӗмӗрхи агротехникăнах тӗпе хурать. Ытларах органика удобренийӗпе усă курать. Тухăçӗ те япăх мар, пӗлтӗр 12 тонна помидор тата 2 тонна хăяр илнӗ. Çимӗçе çуллен апрель уйăхӗ вӗçне ӗлкӗртет.

Нитратсăр ӳстернӗ пахча çимӗçе вара Аксу, Нурлат тата Хусан хапăлласах туянать-мӗн. Фермер хăйӗн туянаканне хисепленине те палăртмалла кунта, продукцие сутнă кун ирхине кăна аври çинчен татать вăл. Тепӗр çирӗп приниципӗ те пур унăн – лайăх сорт лартасси. Ку ӗçре вара профессионалсене шанать, çавăнпа вăрлăха çуллен çырăнса кăна илет, хăй тумасть. Паллах, йӳнӗ мар ку, пӗр пӗрчи 8-100 тенкӗ таранах тăрать. Апла пулин те хакне кăларать. Пӗлтӗр, тӗслӗхрен «Розовый спам» сортăн пӗр помидорӗ килограмм чухлех тайнă.

Хальхи вăхăтра Петрушковăн теплицисенче хӗрӳ ӗç, помидорсене çӗр çине куçарса лартнă, сутлăх валли акнă петуни, вербена, портулак, алиссум чечек калчисем те шăтнă ӗнтӗ. Вӗсене те фермер май уйăхӗн 1-мӗшӗ тӗлне ӗлкӗртет. Çапла вара Петрушковсен чечекӗсем Аксу, Нурлат, Çарăмсан тата Чистай урамӗсене илем кӳреççӗ.

Петрушковсем ӗмӗрӗпех çӗрпе аппаланаççӗ пулсан та, ӗçтешӗсен опытне шута илеççӗ, Самар, Оренбург фермерӗсемпе яланах çыхăнура. Вырăнти фермерсемпе опытпа паллашма та хирӗç мар. Пӗр ахаль курма килекенсем валли кăна теплицисен алăкӗсем хупă, мӗншӗн тесен ӳсен-тăран  ача пекех, усал куçран хăрать.

<< Первая < Предыдущая 1 2 3 4 5 6 7 8 9 10 Следующая > Последняя >>
Страница 1 из 154
В Республике