Аксу волонтерӗсем салтаксем патне гуманитари пулăшăвӗпе 48-мӗш хут çула тухнă

Ку рейспа 13 салтак валли ятлă посылкăсем ăсатнă аксусем, кашнине 6-шар посылка тухать. Çавăн пекех район ятӗнчен тата 70 посылка пухса хатӗрленӗ. Водительсем çула тухсан вӗсем патне унччен чылайччен çыхăнăва тухман пӗр салтак шăнкăравланă, ăна та запас посылкăсенчен пӗри лекессине пӗлсен хӳтӗлевçӗ питӗ савăннă. Вăл Аксу районӗн пуçлăхне Алмаз Минвазыхович Мингулова, ашшӗ-амăшӗсене, тăванӗсене, волонтерсене, ачасемпе пенсионерсене – пулăшакансене пурне те – тав тунине видео ӳкерсе янă.

Çула тухнă волонтерсем çавăн пекех ачасем Мăнкун ячӗпе хатӗрленӗ саламлă çырусене, открыткăсемпе ӳкерчӗксене, илемлетнӗ çăмартасене те салатксем патне çитереççӗ. Уйрăмах Варвара Панковăна тав – вăл илемлетнӗ йывăç çăмартасене кашни посылка ăшнех чикнӗ.

Волонтерсем СВО зонине кашни каймассерен маскировка сетки илсе каяççӗ. Халӗ те акă 56 штук (пӗтӗмӗшле лаптăкӗ 4032 тăваткал метр) илсе кайнă. Окоп çуртисемпе 3D-принтерпа пичетлекен изделисене те самаях хатӗрленӗ хальхинче. Салтаксем ыйтнă нумай хатӗрпе япала пур гуманитари пулăшăвӗ тиенӗ машинăсем çинче.

Гуманитари пулăшăвне «СВОих не бросаем Аксубаево» Пулăшупа тӗрев центрӗ (Аксури çар комиссариачӗ çумӗнче) пухса ăсатнă. Ку ӗçе Аксу районӗн пуçлăхӗ Алмаз Мингулов тата унăн çумӗ Ильшат Загидуллин та хутшăннă. Волонтерсем салтаксене кирлӗ япаласене пухма пулăшнă кашни çынна тав тăваççӗ.

Татьяна МАКСИМОВА.

Автор сăнӳкерчӗкӗсем.