Аптӑранӑ кӑвакал кутӑн чӑмнӑ

Юханшывсемпе кӳлӗсенчи пӑр кирлинчен ҫӳхерех пулнипе тата ҫанталӑк ӑшӑ тӑнипе  Шупашкар мэрийӗ хула ҫыннисене Кӑшарни тума хулари шкулсемпе гимназисен бассейнӗсене чӗннӗ.

Ҫакӑн ҫинчен Алексей Ладыков мэр хӑйӗн Инстаграмӗнче пӗлтернӗ. Ун сӑмахӗпе бассейнсенчи шыва мӗн пур йӗркене пӑхӑнса святить тунӑ. Шупашкар-чӑваш епархийӗн тӗн ӗҫченӗсем ҫакӑн валли пысӑк ӗҫ туса ирттернӗ, шыва кӗлӗ вуласа тасатнӑ.
Шӑматкун 23:00 сехетре 12 муниципаллӑ учреждени алӑкӗсене уҫнӑ. Бассейнсем январӗн 19-мӗшӗнчи 20:00 сехетчен ӗҫлӗҫ.
Мэр сӑмахӗпе шывӑн санитари лару-тӑрӑвӗ пирки пӑшӑрханма кирлӗ мар, бассейнсене санэпидемстанци тӗрӗслесе тӑрать.
Ҫав вӑхӑтра социаллӑ сетьсенчи комментарисем ҫыракансем пурте ҫакна ырлаҫҫӗ тесе калама ҫук. Ӗненекенсем хыҫҫӑн вӑл бассейнсене ачасен кӗмелле-ҫке.
Тепӗр енчен пуҫлӑхсен ӗненекенсен хӑрушсӑрлӑхӗ пирки те шутламалла. Вӗсем ҫирӗп мар пӑр ҫине йышлӑн туха пуҫласан пысӑк инкек пулма пултарать.

Учрежденисене ҫынсене тӳлевсӗр кӗреҫҫӗ. Анчах вакрипе танлаштарсан, бассейнри шыв самай ӑшӑрах, Кӑшарнин асамлӑхӗ камшӑн-тӑр сӗвӗрӗлме пултарать. Ҫапах чунтан ӗненекенсене ку чармалла мар пек. Хальхи вӑхӑтра Иордан ҫырминчи шыв та пӑрпа витӗнмен, ӑшӑ.

А. Ладыков страницинчи сӑнӳкерчӗксем