Чăваш ачин чăвашла пӗлмеллех!

Чăвашсен Аслă Вӗрентекенӗ Иван Яковлевич Яковлев хăйӗн чăваш халăхӗ патне çырнă Халалӗнче вырăс халăхне юратса пурăнăр, хамăр чăваш пулнинчен ан вăтанăр, чӗлхене ан çухатăр тет.

Эпир те шкулта ачасем чăваш чӗлхине ан манччăр тесе тӗрлӗ ӗçсем пурнăçлатпăр. Чăваш халăхӗн историйӗпе паллаштарас тӗллевпе ялти музее экскурсисем йӗркелетпӗр. Музейре ачасем хамăр мăн асатте-асаннесен тумӗсемпе, ӗç хатӗрӗсемпе, кил-çурт йӗркипе паллашаççӗ. 

Чăваш чӗлхипе литература урокӗсенче чăваш писателӗсемпе поэчӗсен хайлавӗсене тишкеретпӗр. Класс тулашӗнчи мероприятисенче те чăваш  йăли-йӗркисене, вăййисене, юррисемпе ташшисене вӗренетпӗр. Анне  кунӗнче ачасен хушшинче сăвă конкурсӗ иртрӗ – вӗсем анне çинчен чăвашла сăвăсем каларӗç. Ваттисен кунӗнче пуçламăш класс ачисем «Кукаçипе куками» юрра клип туса кăтартрӗç. Килнӗ ватă хăнасем хавассăн алă çупрӗç. 

Пирӗн шкул ачисем чăвашла иртекен тӗрлӗ конкурссемпе олимпиадăсене те хастар хутшăнаççӗ. Алина Годунова республика шайӗнче иртекен наукăпа практика конференцине «Чăваш ачисен Мăнкунра вылякан вăййисем» проектпа хутшăнса призёр дипломне илчӗ. Яна Романова Пӗтӗм Раççейри «Манăн çемье  Аслă Çӗнтерӳ историйӗнче» тӗпчев конкурсӗнче иккӗмӗш вырăна тивӗçлӗ пулчӗ. Милена Сачкова «Сувар»  хаçат ирттернӗ «Эпир – Аслă Вӗрентекенӗмӗрӗн еткерçисем» конкурсра çӗнтерӳçӗ пулса тăчӗ.

Февралӗн 21-мӗшӗ – Халăхсен хушшинчи Тăван чӗлхе кунӗ. Çак кун пирӗн шкулта «Тăван чӗлхене юратса» вулакансен конкурсӗ иртет. Уява курма ашшӗ-амăшӗсене те чӗнесшӗн.

Çакăн пек тӗрлӗ мероприятисем ирттерсе ачасене тăван чӗлхене пӗлме, хисеплеме, упрама вӗрентес тесе тăрăшатпăр.

Татьяна ИВАНОВА, пуçламăш классене вӗрентекен.

Çӗпрел районӗ, 

Чăваш Çӗпрел шкулӗ.

Автор сăнӳкерчӗкӗсем.