Пӗчӗк чăрăшсемпе хырсене этем пулăшăвӗ кирлӗ

Тутарстанри экоактивистсем июлӗн 24-мӗшӗнче Пестрецы районӗнчи питомникра «Вăрман парнелетпӗр» акци ирттереççӗ. Хӗрсемпе каччăсем чăрăшсемпе хырсен рассадисене çум-курăкран хăтарас тесе пухăнӗç.

2021 çулхи майра пӗр гектар лаптăк çинче хыр породисен вăррисемпе акăннă. Питомникра ӳстерекен рассадăсене 2-3 çултан вăрмансене куçараççӗ. Анчах çак самантчен чăрăшсемпе хырсен пӗчӗк вуллисем ӳсе çитеймессе пултараççӗ, вăрманçăсен ӗçӗ харама каять. Мӗншӗн тесен çумлă курăксем чăрăшпа хыртан хăвăртах ӳсеççӗ те йывăç тӗпӗсене аталанма кансӗрлеççӗ.  

«Хыр тавраш йывăçсене ӳстересси – питӗ кăткăс ыйту. Вăрлăхсем шăтсанах эпир вӗсене ятарлă хӳтлӗхсемпе хӗвелтен хуплатпăр. Йывăçсен рассадисене ӳсме лайăх микроклимат йӗркелетпӗр. Анчах та çум-курăксем активлăрах тымар яраççӗ те тулăх тăпран сӗткенӗсене сăвăрса илеççӗ», – тесе ăнлантарнă журналистсене ТР Вăрман хуçалăхӗн министерствин вăрман ӗрчетес енӗпе ӗçлекен уйрăм начальникӗ Тимур Галиев.

Питомникри пӗчӗк хырсемпе чăрăшсене хăтарас тесе вӗсене çум-курăкран тасатас меслете суйласа илнӗ, мӗншӗн тесен химикатсем йывăçсен тӗпӗсене сиен кӳме пултараççӗ.

Мероприяти шăматкун июлӗн 24-мӗшӗнче пулать. Унта хутшăнас текенсем валли трансфер йӗркеленет. Вăрманçăсем вӗсене пулăшакансене кăвар ăшӗнче пӗçернӗ çӗрулмипе тата пылак чейпе хăналаса яма шантараççӗ.

ТР Вăрман хуçалăх министерствин сăнӳкерчӗкӗсем