Экологи урокӗсене садикранах ирттереҫҫӗ

Экологи юхӑмӗ ӗнтӗ пилӗк ҫул ӗҫлет
Тутарстанри ҫамрӑксен чи пысӑк экологи организацийӗ "Таса пулать" ятлӑ. Унта кӗрекенсем санитари тата ҫутҫанталӑк акцийӗсене 1001 хисепе ҫитересшӗн. Кун ҫинчен организацин пресс-служби пӗлтерет.
"Таса пулать" юхӑм 2015 ҫултанпа ӗнтӗ пилӗк ҫул ӗҫлет. Ҫак вӑхӑт хушшинче экоактивистсем 706 мероприяти ирттернӗ, вӗсен йышне 8,2 пин ҫын хушӑннӑ. Организацире палӑртнӑ тӑрӑх, ку вӑл официаллӑ сайтра регистрациленнисем кӑна-ха, чӑнласа проекта экологи проблемисене ҫывӑха хуракан 25 пин ытла ҫамрӑк тӗрев панӑ.
Юхӑмӑн активисчӗсем ватӑ ҫынсемпе ветерансене пулӑшаҫҫӗ, йывӑҫсем лартаҫҫӗ, вторсырье пуҫтараҫҫӗ, конкурссемпе фестивальсем ирттереҫҫӗ. Унсӑр пуҫне республикӑри шкулсемпе ача сачӗсенче экологи пӗлӗвӗсен урокӗсене ирттереҫҫӗ.