ЭПИР ПУÇЛĂХА МАР, ПРЕЗИДЕНТА СУЙЛАРĂМĂР!

Тутарстанăн çитес 5 çула аталану курсӗ паллă. Ку вăл – вăйлă экономика, социаллă ипотека, çӗнӗ ача сачӗсем, шкулсем, ялсенче çӗнӗ Культура çурчӗсем, ФАПсем, ветеринари пункчӗсем...​ Социаллă программăсене малалла тăсма, республикăра халăхсен туслăхне сыхласа хăварма шантаракан наци лидерне Рустам Минниханова халăх тепӗр срока Президент пулма суйларӗ. Сентябрӗн 11-13-мӗшӗсенче пынă суйлавра республикăри 1,9 миллион ытла çын (пӗтӗмпе 83,4 процент) уншăн хăй сассине пачӗ. Çирӗп çӗнтерӳ! Тата çакна та палăртмалла: тутарстансем хальхинче те ытти регионсем пек Пуçлăха мар, Президентах суйларӗç.

Рустам Минниханов Президент должноçӗн ӗçне паян, сентябрӗн 18-мӗшӗнче, пуçăнчӗ. Инаугурацие хăш кун ирттерессине сентябрӗн 16-мӗшӗнче республикăн Патшалăх Канашӗн президиумӗн ларăвӗнче депутатсем палăртнăччӗ. Çапла вара церемони ирхине 10 сехетре Салих Сайдашев ячӗллӗ Пысăк концерт залӗнче пуçланчӗ. Мероприятин пӗлтерӗшне тата халăх питӗ интересленнине кура ăна теле- тата радиокомпанисем тӳрӗ эфирта кăтартрӗç.

Хамăр корр.
​ Сăнӳкерчӗк tatarstan.ru сайтран