Икӗ конкурсра икӗ ҫӗнтерӳҫӗ
Жюри пайташӗсем чӑвашсене конкурссене хутшӑнакансем сахал пулнӑшӑн критикленӗ
Ленинград облаҫӗнчи Халӑхсен Туслӑх Ҫуртӗнче "Санкт-Петербургри Чӑваш пики-2020", "Ленинград облаҫӗнчи Чӑваш пики-2020" конкурссен регионри тапхӑрӗ иртнӗ. Ӑна йӗркелекенсем ҫаксем: Санкт-Петербургри ЧНКА, Ленинград облаҫӗнчи чӑвашсен культура обществи, Чӑваш Ен Хӗрарӑмӗсен союзӗн Питӗрти уйрӑмӗ.
Конкурса хутшӑнас текен хӗрсен чӑваш халӑхӗн культурине, историне, йӑлисене пӗлмелле пулнӑ, хӑйне сцена ҫинче тытма пӗлни, артисцизм, граци те ку чухне ытлашши мар.
Икӗ конкурсра та хӗрсен 4 тӗрӗслев тапхӑрӗ витӗр иртмелле пулнӑ: "Визит карточки", "Пултарулӑх конкурсӗ", "Халӑх апат-ҫимӗҫӗ" ,"Чӑваш тумне кӑтартни".
Пандемине пула конкурс куракансемсӗр иртнӗ. Хулари конкурсӑн жюри пайташӗсен хушшинче бард юррисене юрлакан Алексей Попов асли пулнӑ. Ҫавӑн пекех унта "Юрату" ансамблӗн солистки Алевтина Челнокова, Питӗрти ЧНКА ертӳҫи Валериан Гаврилов пулнӑ. Облаҫри конкурс жюрине Туслӑх Ҫурчӗн ертӳҫин ҫумӗ Елена Ермолина, Алевтина Челнокова, Туслӑх Ҫурчӗн пай пуҫлӑхӗ Дмитрий Родышевцев кӗнӗ.
Конкурс заданийӗсем вӗҫленнӗ хыҫҫӑн жюри конкурсра ҫӗнтерекенсене дипломсемпе сувенирсем парса чысланӑ.
"Санкт-Петербургри Чӑваш пики-2020" ята Марина Кириллова ҫӗнсе илнӗ, "Ленинград облаҫӗнчи Чӑваш пики-2020" ята – Татьяна Калошева.
Марина Кириллова Самар облаҫӗнчи Похвистневора ҫуралса ӳснӗ, Татьяна Калошева Вӑрнар районӗнчи Хурапыр ялӗнче ҫуралса ӳснӗ.
Икӗ хӗр те Питӗрти Чӑваш ҫамрӑкӗсен пӗрлешӗвӗн хастарӗсем.
Следите за самым важным и интересным в Telegram-канале Татмедиа
