Иккӗмӗш хут сан серепӳне çакланмастăпах! Кăштах кулăш

Автобусра кондуктор Вӗçкӗн Ваççа патне пырать:

– Çулшăн тӳлӗр, – тет.

– Эпӗ – пӗччен атте, – хуравлать Ваççа.

– Миçе ача вара сирӗн? – ыйтать кондуктор.

– Вуннă.

– Ай-уй, мӗнле пăхса пӗтереетӗр ун чухлӗ ачана?

– Мӗн пăхмалли марри вара? Вӗсем амăшӗсемпе пурăнаççӗ...

– Эсир вара?

– Эпӗ – пӗччен атте...

×××

Вӗçкӗн Ваççа çитӗннӗ ывăлӗ патне шăнкăравлать:

– Итле-ха, ывăлăм, кил пирӗн пата дачăна.

– Çук!

– Кунта тутлă ӗçме-çиме, шашлык, хитре хӗрсем...

– Атте, иккӗмӗш хут сан ултавун серепине лекместӗпех. Хăвăр çӗрулмийӗре хăвăрах кăларăр атя!..

×××

Чăнкă Мирун арăмӗпе уйрăлма суда пынă тет.

– Уйăрăр пире, текех эп унпа пурăнмастăп! Вăл çывăрмалли пӳлӗмре качака усрать. Чăтма çук шăршă тăрать... – тет хайхи.

Судья:

– Вара? Мӗншӗн тӳрех уйрăлмалла? Пӳлӗме чӳречене уçса уçăлтарма пулать вӗт-ха?

– Аха, çиччас... Манăн кăвакарчăнсем вӗçсе тухса кайччăр-и?..

×××

Ача садӗнчи воспитательница Виолетта Валерьевна пӗрремӗш ӗç кунӗ вӗçленнӗ çӗре хăй Фиолетовое Варенье ятлине ӗненмех пуçланă.

×××

Вӗçкӗн Ваççа ӗçе вырнаçма килнӗ тет.

– Эсир мӗн ятлă? – ыйтаççӗ унран.

– Василий.

– Ачăрсем пур-и?

– Пур. Василий ывăл тата Василиса хӗр.

– Килте йытă-кушак тавраш усратăр-и?

– Васька ятлă кушак пур.

– Шел пулин те, эпир сире креативлă директор должноçне ӗçе илейместпӗр...

×××

Вӗçкӗн Ваççа ӗçе вырнаçма пынă тет. 

– Миçе чӗлхе пӗлетӗр? – ыйтаççӗ унран.

– Тăваттă.

– Мӗнлисене?

– Чăвашла, вырăсла, акăлчанла, французла, – тет.

– Акăлчанла мӗн те пулсан калăр-ха.

– Гутен таг!

– Ара, ку нимӗçле-çке...

– Апла-тăк, пилӗк чӗлхе пӗлетӗп...

×××

Яка Кулине упăшкине:

– Уйрăлма заявлени кайса паратăп. Машинăсене çурмалла пайлăпăр: мана – «Лексус», сана – кӗпе çумалли.