Хусанти парада ахаль çынсен телевизорпа çеç курма пулӗ

Çакăн пек йышăну тунă Тутарстан влаçӗсем. Июнӗн 24-мӗшӗнче Тăван Çӗршывăн Аслă вăрçинче çӗнтернӗренпе 75 çул çитнине халалласа иртекен чаплă мешехе Хусанта еплерех пуласси çинчен журналистсене ТР Премьер-министрӗ Лейла Фазлеева каласа панă.

Куракансене çак мероприятие чӗнмеççӗ, Хусанти çар гарнизонӗн маршне телевизорпа курма сӗнеççӗ. Йăла тăрăх çар çыннисем Кремль çывăхӗнчи Пинçуллăх лапамĕнче мар, Ирӗклӗх тӳремӗнче пухăнӗç. Унччен çар çыннисем пухăнакан тата иртекен вырăнсене дезинфекцилӗç. Марша хутшăнаканем пурте маскăсемпе тата перчеткесемпе пулӗç.

РФ Тӗп санитари врачӗ парада курма ветерансене çеç ирӗк панă, паллах, мӗн пур хăрушсăрлăх нормисене пăхăнсан çеç.

Аслă Çӗнтерӳ 75 çул тултарнине халалласа июнӗн 24-мӗшӗнче Раççейри çар корпусӗсемлӗ 28 хулара, çав шутра герой-хуласенче те, парадсем иртеççӗ. Хăш-пӗр регионсенчи эпидеми лару-тăрăвне пула, влаçсем уяв мероприятийӗсене урăхла форматпа ирттерме палăртаççӗ.