Сувар

«КАМАЗ-мастерăн» Хӗл Мучийӗ те чăваш!

Кулленхи пурнăçра вăл инженер, раллисенче – штурман, праçникре вара – чăн-чăн Хӗл Мучи!

«Кулленхи пурнăçра вăл инженер, раллисенче – штурман, праçникре вара – чăн-чăн Хӗл Мучи!» – тесе çырнă «КАМАЗ-мастер» командăн соцсетьри пӗр ушкăнӗнче лартнă сăнӳкерчӗк айне. Хӗл Мучи кам пулнине пӗлме ыйтса асăннă команда спортсменӗсенчен тăватă çынна сӗннӗ: Айдар Беляев, Андрей Мокеев, Дмитрий Никитин тата Дмитрий Свистунов.

Сăнӳкерчӗкри Хӗл Мучин сăнӗ аван курăнмасть пулин те, темшӗн вăл тӳрех хамăр ентеш, Çырчалли чăвашӗ Д.Никитин пекех туйăнчӗ. Суйлав кнопкисенчен шăпах унăн ячӗпе хушаматне çырнине пусса сасăларăм. Тепӗр кун тӗрӗс хурав епле пулнине пӗлтерчӗç. «КАМАЗ-мастер» ачисене саламлакан Хӗл Мучи чăнах та Дмитрий Никитин иккен! Маттур йăхташăмăр «Дакара» хатӗрленмелли хӗрӳ тренировкăсен вăхăтӗнче ачасене савăнтарма та вăхăт тупнă. Ара, хăйӗн те икӗ ывăл ӳсет-çке.

Тепӗр темиçе кунран вара Дмитрий «Дакар – 2019» халăхсен хушшинчи ралли-рейда тухса каять. Вăл хальхинче Перура январӗн 6-17-мӗшӗсенче иртет. Ентешӗмӗр ку хутӗнче Дмитрий Сотников экипажӗнче штурман. Тутарстан командине тӗнче шайӗнчи ăмăртуран çӗнтерӳпе таврăнма сунатпăр! (Сăнӳкерчӗк «КАМАЗ-мастер» командăн).

 

Следите за самым важным и интересным в Telegram-канале Татмедиа


Нравится
Поделиться:
Реклама
Комментарии (0)
Осталось символов: