Хаклă ачасемпе çамрăксем, сире пурсăра та конкурса хастар хутшăнма чӗнетпӗр!
Тутарстан Республикинчи ЧНКА çумӗнчи Чăваш çыравçисен союзӗ «Сувар» республика хаçачӗпе пӗрле шкул ачисемпе студентсен хушшинче «Çамрăк çыравçă» литература конкурсне ирттерни пирки аса илтеретпӗр. Унăн тӗллевӗ – ачасемпе çамрăксене чăваш литературипе интереслентересси, çырма хавхалантарасси тата ун кăтартăвӗсем тăрăх ЧНКА çумӗнчи ТР Чăваш çыравçисен союзӗнче çамрăк писательсен секцине йӗркелесси.
Унта Тутарстанри пӗтӗмӗшле пӗлӳ паракан чăваш шкулӗсенче тата вăтам профессилле, аслă пӗлӳ паракан вӗренӳ заведенийӗсенче вӗренекенсем пурте хутшăнма пултараççӗ. Çул ӳсӗмӗ – 7-рен пуçласа 25 çула çитиччен.
Конкурс 2022 çулхи майăн 27-мӗшӗнче пуçланнă, ноябрӗн 25-мӗшӗччен тăсăлать. Çак хушăра редакцие 420066, Хусан хули, а/я 64 адреспа çыру вӗççӗн е suvar@mail.ru электронлă адреспа хăвăрăн хайлавăрсене ярса парăр. Конкурс материалӗсене литературăн хуть те мӗнле жанрӗпе те – поэзи, проза, драматурги, урăхла каласан сăвă, калав, эссе, очерк, пьеса... – çырма пултаратăр. Конкурса ярса панă хайлавсене «Сувар» хаçатра пичетлетпӗр, декабрь уйăхӗнче вӗсене жюри пайташӗсем пăхса тухса хак параççӗ те çӗнтерӳçӗсене палăртаççӗ. Çӗнтерӳçӗсене пурне те ТР ЧНКА çумӗнчи Чăваш çыравçисен союзӗнчи çамрăк писательсен секцине йышăнма палăртнă.
Çавăн пекех Петӗр Хусанкай çуралнăранпа 115 çул çитнине халалланă конкурссене те – «Эпир Хусанкай ентешӗсем», «Эпир пулнă, пур, пулатпăр!» тата «Петӗр Хусанкай пултарулăхӗпе ирттернӗ чи лайăх урок» – хайлавсем, видеороликсем тата уроксем кӗтетпӗр.
Редакци.
Следите за самым важным и интересным в Telegram-каналеТатмедиа
Нет комментариев