Хальхи культурăна грантсемсӗр аталантарма йывăр

Июнӗн 15-мӗшӗнче культура сферинче РФ Президенчӗн гранчӗсене илмелли конкурс заявкăсем йышăнма пуçланă. Çак хыпара журналистсемпе блогерсене ТР культура министрӗ Ирада Аюпова Г.Камал театрӗн балконӗ çинче чей ӗçнӗ вăхăтра пӗлтерчӗ. Министр прессăшăн уçă çын пулнине тахçанах пӗлетпӗр. Халӗ тӗлпулу пресс-конференци пек мар, пӗр шухăшлă çынсен хăйне евӗр канашлăвӗ пек иртрӗ.

Культура пуçарăвӗсен фончӗ креативлă индустрийăсен сферинчи пуçарусене тӗрев пама тивӗç. Çак концепцине федераллă шайра хатӗрленӗ.

«Патшалăх паян экономика аталанăвӗн пуласлăхӗн хăвачӗ пултарулăхра тесе калать-тӗк, ку питӗ лайăх хыпар», – тет министр. Вăл конкурс июлӗн 30-мӗшӗччен тăсăлассине пӗлтерчӗ, пурне те унта хутшăнма чӗнчӗ. Унта уйрăм предпринимательсем те, коммерцилле мар организацисем те, культурăн муниципаллă учрежденийӗсем те хутшăнма пултараççӗ.  

Журналистсене чейпе сăйланисӗр пуçне, Камал театрӗн ертӳçисем министрпа калем ăстисем валли экскурси ирттерчӗç.