Кивви те ҫӗнни пекех лайӑх ӗҫлет

Пурӗ 33 автомобильпе пуянланнӑ МЧС-никсен паркӗ. 17 ҫӗнӗ КАМАЗ, 12-шӗ юсаса ҫӗнетнисем, 4 ҫӑмӑл машина.
"Капремонт – Тутарстан Президенчӗ Рустам Минниханов тӗрев панӑ уникаллӑ программа. Реставрациленӗ машинасем ҫинче агрегатсене улӑштарнӑ, вӗсене машинасен хӑватне ӳстерекен тата топливона перекетлеме май паракан дизель двигательсем вырнаҫтарнӑ. Программа пулӑшнипе 3 ҫул хушшинче эпир 130 единица техника реставрацилерӗмӗр ӗнтӗ, – тесе пӗлтернӗ Тутарстан Республикинчи МЧС Управленийӗн пуҫлӑхӗ Рафис Хабибуллин.
Ҫӗнӗ тата юсаса ҫӗнетнӗ машинасене пушарпа кӗрешекен подразделенисене панӑ. Вутпа кӗрешекенсем техника пахалӑхӗ лайӑхланнине палӑртнӑ. Тӗслӗхрен, пушар машинисен шыв саппасӗ ӳснӗ.
"Малтан шыв бакӗ 2,5 кубометрччӗ, ҫӗнӗ машинасене вӑл 8 куба ҫитет. Ку пирӗн ӗҫе самай ҫӑмӑллатать,– тесе каланӑ Алексей Алтынов водитель. Вӑл техникӑри ҫӗнӗ насоссемпе тата электроникӑпа та кӑмӑллӑ.
Вутпа кӗрешекенсене пушар машинисен уҫҫисене парас церемони паян "Казан" ҫемье центрӗ патӗнче иртнӗ. Ҫӗнӗ техникӑна туянма республика бюджетӗнчен 180 млн тенкӗ уйӑрнӑ.