Коронавирус чирӗ шӳтлемест, вăл вӗлерме пултарать

Кану вăхăтне тухтăрсем хамăр республикăрах ирттерме сӗнеççӗ. Мӗншӗн тесен Раççейри чылай регионра санитарипе эпидемиологи лару-тăрăвӗ Тутарстанринчен япăхрах. Турцие канма вӗçес текенсене те, хăйсен сывлăхне тӗрӗслесе тăнисӗр пуçне, страховкăн сумми мӗнле пуласси пирки кăсăкланма сӗнеççӗ. Вăл пӗчӗк пулсан ют çӗршыври медицина коронавирус инфекцийӗпе кӗрешнӗшӗн нумай укçа ыйтма пултарать. Тӗслӗхрен, Америкăра ИВЛ аппарачӗпе сиплеме пӗр çынран 1,2 миллион доллар илме пултараççӗ. Çавăнпа та лару-тăру лайăхланиччен ют çӗршывсене кайма сӗнмеççӗ пирӗн тухтăрсем.
– Коронавируспа чирленисемпе ӗçлекен Тутарстан медикӗсем хăйсене мӗнле туяççӗ? – тесе ыйтрăмăмр эпир пресс-конференцие килнӗ ТР сывлăх сыхлав министрӗн пӗрремӗш çумӗнчен Эльмир Абашевран.
– Чирлисен шучӗ республикăра пӗтӗмӗшле чакса пынине шута илсен, эпир часах округсенчи пульницасене те яланхи режимра ӗçлеме куçарма палăртатпăр. Тӗслӗхрен, çитес эрнере Çырчаллинчи пульницасенче ӗç условийӗсене улăштарма палăртнă. Врачсем хăйсене лайăх туяççӗ, кăмăлпа ӗçлеççӗ. Вӗсене черетлӗ отпусксене те яма май пур.
Çав вăхăтра июлӗн 30-мӗшӗ тӗлне Тутарстсанра коронавирус ертнӗ 35 çӗнӗ тӗслӗх тупса палăртнă. Вӗсенчен 12-шне пульницана вырттарнă, 23-шне килӗсене сипленме янă. Чирлисем Хусантан –14 çын, Тури Услонпа Анат Камăран – 4-шар, Çырчаллирен, Атня, Пӗкӗлме, Ешӗлвар районӗнчен – 2-шер çын, Пăва, Кукмор, Лайăш, Саба, Чистай районӗнсенче пӗрер çын чирленӗ.
ИВЛ аппарачӗсен айӗнче 40 çын выртать, стационарсенче 495. Пандемия пуçланнăранпа çак вăхăта çити коронавирусран 41 çыннăн пурнăçӗ татăлнă.