Ку субсидие усламçăсене суйласа илсе кăна параççӗ

РФ Правительствин 2020 çулхи июлӗн 2-мӗшӗнче тухнă 876 номерлӗ постановленийӗ тăрăх, COVID-19 пандемиинчен хур тӳснӗ хăш-пӗр отрасльсене садитарипе дезинфекци хатӗрӗсем туянма пӗр хутченхи субсиди парăнать.
Унта спорт, кану (ОКВЭД 93), физкультурăпа сывату (ОКВЭД 96.04), санаторипе курорт (ОКВЭД 86.90.4), вăхăтлăх пурăнма вырăнсем парас ӗç (ОКВЭД 55), ӗмелли-çимеллипе тивӗçтерес (ОКВЭД 56), килти электронлă хатӗр-хӗтӗре тата компьютерсене юсас ӗç (ОКВЭД 95), япала çăвас тата химчистка (ОКВЭД 96.01), парикмахерскисемпе илем салонӗсен ӗçӗ (ОКВЭД 96.02), ачасемпе аслисен хушма вӗрентӗвӗ ( ОКВЭД 85.41), ачасене кăнтăрла пăхас ӗç (ОКВЭД 88.91) отраслӗсем кӗреççӗ.
Тутарстанра çакнашкал ӗç илсе пыракан субьектсем 32 пин ытла. Паянхи кунта субсидие илме 3142 юридици сăпачӗ заявлени çырса панă. Ку чухне чи кирлӗ критерий – организацири çын шучӗ çуркуннеренпе чакманни. Тата налог тӳлессипе парăмсем 3000 тенкӗрен иртменни. Мӗншӗн тесен дезинфекци хатӗрӗсене туянма организацири пӗр çын пуçне 6500 тенкӗ парăнать, тата пӗр хутчен 15000 тенкӗ. Уйрăм предприниматель çын тара илмесӗр хăй кăна ӗçлет пулсан, ăна пӗр хутчен 15 пин тенкӗ парăнать. 
Ертӳçи пӗр хутчен парăнакан субсидие илме заявлени çырса панă вăхăтра предприяти ликвидаци тапхăрӗнче пулмалла мар. Сăмах май вӗсене июлӗн 15-мӗшӗнчен пуçласа августăн 15-мӗшӗччен кăна йышăнаççӗ. 
Субсиди тӗллевлӗ. Ăна еплерех тăкакланине те тӗрӗслекен структурăсем пулаççех. 

 

Реклама