Mускав тӑвӑлӗ Оренбург облаҫӗнчи чӑваш ялне ҫитнӗ

Июнӗн 30-мӗшне Оренбург облаҫӗнчи Грачевка районӗнчи Тури Игнашка ялӗнче пурӑнакансем нумайччен манаймӗҫ-ха.
Хӑрушӑ ҫил-тӑвӑл ял витӗр иртсе 15 минут хушшинче питӗ пысӑк сиен кӳрсе хӑварнӑ унта пурӑнакан чӑвашсене.
Нумай пӳртӗн ҫивиттине ҫӗмӗрнӗ, хӑшне-пӗрне аякках вӗрсе ывӑтнӑ. Хӳмесем, кӗлетсем, гаражсем ҫинчен каламалли те ҫук. Тӑвӑл хулӑн йывӑҫсене те, ҫӗнӗ ҫуртсен ҫирӗп тӑррисене те хӗрхенмен.
Животноводство фермисен, складсен, гараж-мастерскойсен те тӑррисем çук.
Ял ҫыннисем пӗр талӑк ҫутӑсӑр, ҫыхӑнусӑр, шывсӑр ларнӑ.
Тури Игнашка ялне 312 ҫул, ӗлӗк вӑл Çирӗклӗ ятлӑ пулнӑ. Кивӗ картӑсем ҫинче Зирикла ятпа ҫырӑнса юлнӑ.