Ӗнесем патшалăх субсидийӗсӗр юлмӗç

«Ӗнесем усракансем валли субсидисене яланхилле август уйăхӗнче, тыр-пула пухса кӗртсен уйăраканччӗ, анчах та пӗлтӗр тата кăçал укçасене халăх патне апрель-май уйăхӗнче çитерӗç. Пӗлтӗртенпе субсидисем илме «Мои субсидии» цифра платформинче заявка пама пулать», - тесе пӗлтернӗ ТР ял-хуçалăхпа продовольстви министрӗн çумӗ Ришат Хабипов.

Ун сăмахӗсемпе, кăçал ӗнесемпе качакасем тытма (çав шутра ветеринари ӗçӗсене тума та) 350 млн тенкӗ уйăраççӗ.

«Енчен те фермер кил-çурт хуçалăхӗнче пӗр ӗне усрать пулсан, субсиди икӗ пин тенкӗ пулать, енчен те икӗ ӗне усрать пулсан, кашни ӗне пуçне виçшер пин тенкӗ уйăрӗç. Енчен те хуçа виçӗ е ытларах ӗне усрать пулсан, вӗсемшӗн кашнийӗшӗн тватшар пин тенкӗ парăнать. Унсăр пуçне ветеринари мероприятийӗсене туса ирттернӗшӗн те укçа тавăратпăр, кашни ӗне пуçне – 300 тенкӗ. Ку пысăк пулăшу. Мӗншӗн тесен Тутарстанри уйрăм хуçалăхсенче 100 пин пуç сăвăнакан ӗне, 300 пин пуç мăйракаллă шултăра выльăх усранать. Çакă республикăри пӗтӗмӗшле ӗне кӗтӗвӗн пӗрре виççӗмӗш пайӗ», - тесе палăртнă вăл.  

Сӗтпе ӗçлекен мини-фермăсене тăвакансем валли 50 млн тенкӗ, ăратлă тынасем туянас текенсем валли 10 млн тенкӗ, виçӗ çултан аслăрах лашасем усракансене пулăшма 8 млн тенкӗ уйăраççӗ.