Паттӑрӑн ятне манӑҫа кӑлармӗҫ

Ноябрӗн 13-мӗшӗнче Пӑва районӗнчи Пӳркелӗнчи пӗтӗмӗшле пӗлӳ паракан вӑтам шкулта паттӑр ентеше, Эдуард Мусейкина халалласа асӑну хӑмине уҫнӑ. Вӑл Дагестан Республикинче салтак тивӗҫне пурнӑҫланӑ вӑхӑтра паттӑррӑн пуҫне хунӑ. Мусейкин ятне шкулти юнармеецсен отрядне панӑ, ку вӑл ҫиччӗмӗш клас.
Эдуард Николаевич Мусейкин 1973 ҫулхи ноябрӗн 13-мӗшӗнче Шемекре ҫуралнӑ. Шемексем 9 клас хыҫҫӑн Пӳркелне вӗренме ҫӳреҫҫӗ. Челябинскри танк училищине пӗтерсен Эдуард хӑй ирӗкӗпе Дагестан Республикине хӗсмет иртме каять. Иккӗмӗш Чечен кампанийӗ вӑхӑтӗнче танк колонни Грозныйри консерва заводне атакӑланӑ. Рота командирне суранлатсан Эдуард Мусейкин командованине хӑй ҫине илет. Танкпа ҫула пӳлсе пирӗннисене каялла чакма май туса парать. Тан мар ҫапӑҫура танкри пӗтӗм экипаж вилет.
Ҫак паттӑрлӑхшӑн танк экипажне вилнӗ хыҫҫӑн Паттӑрлӑх орденӗпе наградӑланӑ.
Эдуард Шемекре 3 тултариччен кӑна пурӑннӑ, Пӳркелӗнчи шкулта вӑл вӗренмен. Апла пулин те юнармеецсен отрячӗ ыйтнипе паттӑр ентешӗн асӑну хӑмине дирекци унта вырнаҫтарма шутланӑ.
Вӗренекенсем умӗнче ачасем паттӑра халалланӑ сӑввисене вуласа панӑ. Пӑва тата Ҫӗпрел районӗсен ҫар комисарӗ Радик Тухфатуллин пӳркелсен пуҫарӑвне ырланӑ. Районти Вӗрентӳ управленийӗн начальникӗн ҫумӗ Наталья Македонская та ачасен патриотла воспитанийӗ тивӗҫлӗ шайра пулнине палӑртнӑ.
7-мӗш класӑн ертӳҫи Надежда Пиколова асӑну хӑмине тума пулӑшакансене тав тӑвать.