Питӗрти чӑваш студенчӗ Пӗтӗмраҫҫейри конкурсра ҫӗнтернӗ

Октябрӗн 14-15-мӗшӗсенче Мускавра ҫамрӑксем хушшинчи Пӗтӗмраҫҫейри  "Манӑн закон тӑвакан пуҫару" конкурс иртнӗ. Унта хутшӑнакансем хӑйсен пуҫарӑвӗсемпе жюри эксперчӗсен умне тухмалла пулнӑ. Конкурс икӗ туртан пулнӑ. Пӗрремӗшӗ – Пӗтӗмраҫҫейри куҫӑн мар конкурс – 2020 ҫулхи июнӗн 3-мӗшӗнчен пуҫласа сентябрӗн 30-мӗшӗччен иртнӗ. Конкурс материалӗсене экспертсем патне электронлӑ почтӑпа ярса панӑ. Иккӗмӗшӗ – 2020 ҫулхи октябрӗн 14-15-мӗшӗсенче иртнӗ конкурс ("Пӗтӗмраҫҫейри ҫамрӑксен ХV форумӗн кӗрхи сессийӗ) – унта ҫамрӑксем хӑйсен ӗҫӗсен пӗтӗмлетӗвӗсене жюри умӗнче хӳтӗленӗ.
Конкурса ирттернин тӗп тӗллевӗ – закон кӑларас ӗҫе хутшӑнтарса ҫамрӑксене патшалӑх управленийӗ патне явӑҫтарасси, ҫамрӑксен уйрӑмах  перспективлӑ проекчӗсене суйласа илсе закон кӑларас пуҫарусенче усӑ курасси.
Ҫак конкурсра Санкт-Петербургри тата Ленинград облаҫӗнчи Чӑваш ҫамрӑкӗсен организацийӗн председателӗн ҫумӗ Андрей Иванов хутшӑннӑ. Вӑл Санкт-Петербургри политехника университечӗн 4-мӗш курс студенчӗ. Андрейӑн конкурсри "Патшалӑх йӗркеленӗвӗн тата граждансен конституцилле прависем" направленипе хатӗрленӗ ӗҫӗ куҫӑн мар конкурсра ҫӗнтернӗ. Пӗтӗмраҫҫейри очнӑй конкурсра жюри чӑваш ҫамрӑкӗн наука ӗҫне чи лайӑххи тесе палӑртнӑ. Ӑна "Чи лайӑх студент ӗҫӗшӗн" медаль панӑ тата 1 степеньлӗ диплом.
Андрей Иванов тӗрлӗрен наукӑпа практика конференцийӗсене тӑтӑшах хутшӑнать. Чӑваш чӗлхи пӗлӗвӗ те унӑн ҫӳллӗ шайра. Адвокат пулӑшаканӗ пулса ӗҫленӗ май, вӑл Санкт-Петербургри Чӑваш наципе культура автономийӗн мероприятийӗсене хутшӑнма та вӑхӑт тупать.