Пӗлтӗр Хусанта кунне 40 çынна пытарнă, районсенче 3, кăçал икӗ хут ытларах

Пӗлтӗр Тутарстанра 27,2 пин ача çуралнă пулсан, кăçалхи прогноз – 26,9 пин. Çуралакансем 1,3 процента чакаççӗ, вилекенсен кăтартăвӗсем тӳнтерле. Пӗлтӗр республикăра 33 пин çын вилнӗ пулсан, кăçалхи прогноз – 35,8 пин. Ватăсем нумай вилеççӗ теççӗ, анчах шел пулин те, хальхи вăхăтра, вăтамран илсен 40-65 çулти çынсем çӗре кӗреççӗ. Вӗсене ватă теме иртерех-ха.

Хусанти пытаракан бюросен ертӳçисенчен пӗрин Радик Мустафинăн сăмахӗсемпе, Тутарстанăн шӗкӗр хулин масарӗсенче кунне 75-100 çынна пытараççӗ, районсенчи масарсем 10 çынна йышăнаççӗ. Пӗлтӗр Хусанта кунне 40 çынна пытарнă, районсенче 3. Вилеслӗхӗн ӳсӗмӗ ниепле те 8,2 процент кăна пулма пултараймасть. Коронавируспа чирленисенчен 70 проценчӗ – ӗçлекен çынсем,

Роспотребнадзорăн Тутарстанри управленийӗн кăтартăвӗсемпе, сентябрьте учительсен хушшинче чирлесси 28 процента ӳснӗ, патшалăх служащийӗсен хушшинче 19 процента, пенсионерсен хушшинче – 12 процента. Çынсем отпусксенчен таврăнсан, сентябрьте республикăри ӗç коллективӗсенче коронавирусăн 312 «вучахне» палăртнă, августра кăна çак кăтарту 282 пулнă.

Чирлекенсен тата вилекенсен шучӗ ӳснипе Тутарстанра тата ытти регионсенче чарусем кӗртме хистенӗ.