Пуҫлӑхсем ҫумӗнчи общественниксем суйлав саккунлӑхне тимлӗҫ

 Тутарстанӑн Патшалӑх Канашӗн VI пухӑвӗн суйлавӗсен тасалӑхне 3 пин ҫынран тӑракан общество сӑнавҫисен ӳшкӑнӗ тимлӗ. Вӗсен тӗп тӗллевӗ – сасӑлав саккунпа килӗшӳллӗн иртнине сӑнасси. Ҫакӑн ҫинчен ТР Общество палатин председателӗ Анатолий Фомин журналистсене пӗлтернӗ. 

Ун сӑмахӗпе, суйлавсене общество сӑнавҫисене явӑҫтарасси Тутарстанра темиҫе ҫул каялла та пулнӑ. Фомин каланӑ тӑрӑх, ҫӗнӗ инструмент суйлав процесне ӗненессине ӳстерсе хӑйне тӳрре кӑларнӑ. Общество сӑнавҫисен корпусӗ сентябрьти республика парламенчӗн суйлавне хутшӑнӗ. 

"Пирӗн сӑнавҫӑсем суйлав процесне хутшӑнмаҫҫӗ, вӗсен тӗп тӗллевӗ – ӑна йӗркелекенсем Раҫҫейри тата Тутарстанри суйлав законодательствине пӑхӑннине тимлесси", – тенӗ Общество палатин ертӳҫи. 

Суйлав кунӗ участоксенче политика партийӗсен сӑнавҫисем те пулаҫҫӗ. Анчах та партисем влаҫшӑн кӗрешеҫҫӗ, вӗсен тӗллевӗ – ытларах мандат пуҫтарасси. Хӑш чухне тӗрлӗ партисен представителӗсем суйлав участокӗнчех тавлашма тытӑнаҫҫӗ. Общество сӑнавҫисен ун пек тӗллев ҫук, вӗсем саккуна пӑснине тӗрӗслемелле, - тесе пӗтӗмлетнӗ хӑй те нумай ҫул Тутарстанри Тӗп суйлав комиссине ертсе пынӑ Анатолий Фомин.

Сӑнӳкерчӗксем ТР Общество палатин сайтӗнчен