Шӑп ҫӗр ҫул каялла Тутарстанӑн пӗрремӗш правительствине суйланӑ

Паян Автономиллĕ Тутар Социализмла Совет Республикин Халӑх Комиссарӗсен Канашӗ – республикӑн пӗрремӗш правительстви – йӗркеленнӗренпе 100 ҫул ҫитнӗ.
ВЦИКӑн 1920 ҫулхи майӑн 27-мӗшӗнче тухнӑ "Автономиллĕ Тутар Социализмла Совет Республики ҫинчен" калакан декречӗ тӑрӑх, патшалӑх влаҫӗн аппарачӗ вырӑнти депутатсен канашӗсенчен, Тӗп ӗҫ тӑвакан комитетран, АТССР Совнаркомӗнчен чӑмӑртаннӑ.
АТССР канашӗсен пӗрремӗш учредительнӑй съезчӗ 1920 ҫулхи сентябрӗн 26-27-мӗшӗсенче иртнӗ. Унта АТССРӑн Тӗп ӗҫтӑвкомне (ТатЦИК) суйланӑ. ТатЦИКӑн пӗрремӗш пленарлӑ ларӑвӗ сентябрӗн 28-мӗшӗнче пулса иртнӗ. Унта хутшӑнакансем ТатЦИКӑн Президиумне суйлас ыйтӑва пӑхса тухнӑ, республикӑн пӗрремӗш правительствине – АТССР Совнаркомне йӗркеленӗ, ун шутне 15 ҫын кӗнӗ. Совнаркомӑн пӗрремӗш председательне Сахиб-Гарей Саид-Галиева суйланӑ.