Тутарстанра пурăнакансем «ТАТАРСТАР» конкурсра çӗнтерсе клип ӳкерме пултараççӗ

Тутарстанра «ТАТАРСТАР» талантлă юрăçăсен конкурсӗ тата онлайн-шоу пуçланнă. Унта хутшăнас текенсен хуть мӗнле чӗлхепе юрă юрласа видео çыртармалла та жюрие хак пама ярса памалла.

Конкурса хутшăнакан миçе çулта пулни те, ăçта ӗçлени-вӗренни те пӗлтерӗшлӗ мар. Юрăçăсен пултарулăхне тӳрӗ эфирта майăн 27, 31-мӗшӗсенче тата июнӗн 3-мӗшӗнче, çурма финалта июнӗн 7-мӗшӗнче тата финалта июнӗн 10-мӗшӗнче хаклӗç. Жюрире кашни хутӗнчех республикăри паллă çынсем, артистсем тата музыкантсем пулӗç.

Пӗрремӗш суйлав турӗнче конкурсантсен пултарулăхне РФ тата ТР халăх артистки, Хусанти патшалăх культура институчӗн профессорӗ Венера Ганеева тата «Волга-Волга» ВИА солисчӗ Антон Салакаев хаклаççӗ. Анчах та çӗнтерӳçе жюри кăна мар, куракансем те онлайн мелӗпе сасăласа суйлаççӗ.

Шоун тӗп призӗ – профессиллӗ видеоклип ӳкерни, ăна Тутарстан Республикин соцсечӗсенче сарни.  Суйлав тапхăрӗн пӗрремӗш кăларăмӗ майăн 27-мӗшӗнче 19.00 сехетре https://vk.com/tatarstar_show онлайн-шоу сообществинче иртет. Ăна çавăн пекех Тутарстан Республикин https://vk.com/nashtatarstan официаллă сообществинче, соцсетьсенче те пăхма пулать.

Заявкăна https://vk.com/topic-195020391_40650407 çак ссылкăпа памалла. Тӗплӗнрех проектăн «Одноклассникинчи», Инстаграмри тата Ютубри официаллă аккаунчӗсенче пӗлме пулать.