Уяв юррисем

Çӗмӗрт чечеке ларсассӑн

Вӑрман витӗр курӑнать,

Шурӑ кӗпе тӑхӑнсан 

Уяв витӗр курӑнать.

Лап çеремре сар чечек 

Кӗрсе татӑр, ачисем.

Сар чечек пек Уява

Кӗрсе юрлӑр, ачисем.

Кас суханне касмӑттӑм,

Çиес килни пӗтерет.

Ух, уявне тухмӑттӑм,

Тухас килни пӗтерет.

Чашкӑ-чашкӑ йӑвача 

Касмасӑрах пулмасть вӑл,

Юрӑ пуçласа юрласси

Начар хӗртен пулмасть вӑл.

Уçӑм çинчи сыснана 

Кашкӑр тытни илемлӗ.

Уява кӗмен хӗрсене

Арӑм туни илемлӗ.

Шыва ятӑм виçӗ çӗрӗ

Тутӑхмасӑр ан илӗр.

Эп(ир) çак ялтан каяс çук,

Ӑс кӗмесӗр ан илӗр.

Йӗс кӗлеллӗ аттӑрпа 

Такӑрлатӑр урама.

Шӑнкӑрав пек сассӑрпа

Янрататӑр урама.

Шыв хӗррипе çӳресен те 

Сулла шыва ямастӑп.

Ял варрипе çӳресен те 

Эпӗ ята ямастӑп. 

Сар саппуна сарса çых,

Пиçиххине уçса яр.

Хӑв савнине савӑнтар, 

Курайманне хурлантар.

Тӑрӑсӑр мунча тӑррине 

Вӗлтрен пусса çитернӗ.

Çакă ялӑн хӗрӗсене 

Ыйхӑ пусса çитернӗ.

Чӑкӑр-чакӑр урапине 

Тикӗтлемен тееççӗ.

Çакӑ ялӑн хӗрӗсене 

Питне çуман тееççӗ.

Урам урлӑ каçнӑ чух

Чутах шуса ӳкеттӗм.

Çакă ялӑн хӗрӗсенчен 

Чутах кулса вилеттӗм. 

Манӑн кӗпе вун икӗ ан – 

Чисти майра сарафан.

Çакă ялӑн ачисем –

Чисти хура шарлатан.

Сарӑ кайӑк чӗпписем 

Хитре вӗçеççӗ вӗсем. 

Чӑвашьелӗн хӗрӗсем

Хитре пулаççӗ вӗсем.

Çавӑнпа та юратуллӑ 

Вӗсен савнӑ каччисем.