Вӗçкӗн Ваççа тухтăр патне пынă тет

Чăнкă Мирун хăй çине тăрсан-тăрсан пӗр пăхкаласа илекен, куç хӗсекен майрапа паллашма шутлать.

– Ну, мӗн, чиперкке, сана мотоциклпа çил пек вӗçтерсе ярăнтарса килем-и? – тет хайхискер.

– Çук-çук, манăн ревматизм...

– Эппин атя мунчана каяр, чун каниччен милӗкпе çапăнăпăр.

– Юрамасть мана, чӗре ыраткалать...

– Вара мӗншӗн куç хӗсрӗн-ха, çавнашкал чирлӗскер?

– Шухăшра та пулман, куçсем чапрас манăн...

×××

Лавккара. Черет. Яка Кулине те кăкăр ачипе черетре тăрать. Ывăнса çитнӗ ача кăшкăрса йӗме пуçлать. Лăплантарас тесе тем те тăвать Кулине, усси çук. Ним тăвайман енне черетри нăкă хул-çурăмлă хӗрарăм çине тӗллесе: «Çиччас çак аппана парса яратăп сана», – тесе хăратасшăн пулать ачине. Хайхи хӗрарăм Яка Кулинен сăмахӗсене илтсен ун еннелле çаврăнать те: «Кирлӗ мар, хамăн та виççӗн», – тесе хурать.

×××

Тӗкӗр умӗнче хăйпе хăй киленсе тăракан Чипер Марине упăшкинчен ыйтать:

– Чунăм, эпӗ илемлӗ-и? Ман кӗлетке вара? Куçсем? Пит?..

– Мӗн, тӗкӗр çинче курăнмасть-им? – лаплаттарса хурать упăшки.

×××

Вӗçкӗн Ваççа тухтăр патне пынă тет.

– Тухтăр, эп ют арăмсемпе çывăратăп, çакăншăн вӗсен упăшкисем мана патак çитереççӗ. Мӗн тумалла-ха манăн?

– Салтака кайса килӗр. Кăшт ăс кӗрӗ, – тет тухтăр.

Çулталăк иртсен.

– Тухтăр, тавах сире лайăх канаш панăшăн!

– Эсир текех ют арăмсемпе çывăрмастăр-и?

– Çывăратăп. Анчах та 45 çеккунтра тумланма пултаратăп халь!

×××

Кукша Кӗркурин арăмӗ пачăшкă патне чиркӗве килнӗ тет.

– Тихăн атте, çылăхăма каçарттар-ха...

– Мӗнле çылăх-ха, ырă çыннăм?

– Эх, вăтăр çул каялла упăшкаран айккине кайнăччӗ...

– Эй, вара, ку тахçанах пулнă, Турă каçарнă ӗнтӗ сана, ман кун пирки...

– Манаймастăп çав – аса илме кăмăллă...