Хусанта çулталăкне 20 самолет тума пуçласшăн

Çакăн пирки ТР Промышленность тата суту-илӳ министерствин пӗтӗмлетӳ коллегийӗнче ТР вице-премьерӗ Олег Коробченко пӗлтернӗ.

«Нумайрах самолет туса кăларас тесен заводăн производство хăватлăхне ӳстермелле. Хальлӗхе çулталăкра 1-1,5 самолет çеç тăваятпăр-ха», — тенӗ вăл. 

2032 çулччен 150 самолет кирли паллă. 20 сывлăш карапӗ валли çирӗп контрактсем тунă та ӗнтӗ, 67-шӗ тӗлӗшпе килӗшӳ тунă, тепӗр 61-шне туянас текенсенчен заявкăсем пур. 

Сăмах май, пӗлтӗр çулла Хусанти авиаци заводне РФ Премьер-министрӗ М. Мишустин килсе кайнăччӗ, вăл ун чух Ту-214 самолет пуçтаракан цехпа паллашсан Тутарстана 41,8 миллиард тенкӗ уйăрса пама йышăнни çинчен пӗлтернӗ. Çакă самолет тăвас ӗçе хăвăртлатма пулăшӗччӗ.

Сăнӳкерчӗк «Татар-информ» ИА.