Ялти тăватă çын  çинчен 2003 – 2004 çулсенче пичетленнӗ «Чуваши Татарстана» ятлă кӗнекере те çырнă.

Апрелӗн 23-мӗшӗнче Çӗнӗ Шешкел шкулӗнче Тăван чӗлхесен тата халăхсен пӗрлӗхӗн çулталăкне, Чăваш чӗлхи кунне халалланă тӗлпулу иртрӗ. 1-9 класра вӗренекенсем ялти йăла-йӗркене тытса пыракан П.А.Пимуковпа (канăва кайиччен ялти Культура çурчӗн директорӗ пулса ӗçленӗ), унăн мăшăрӗпе Л.П.Пимуковăпа, шкулта ӗçлесе канăва кайнă С.Т.Ванюковăпа тата Е.П.Мадиянов купăсçăпа тӗл пулчӗç.

Хăнасенчен виççӗшӗ ялти Культура çурчӗ çумӗнчи «Пилеш» пултарулăх ушкăнӗн ӗçне хастар хутшăнаççӗ. Шкул директорӗн воспитани енӗпе çумӗ тата шкулти музей ертӳçи А.А.Саушкина килнӗ хăнасем çинчен каласа пачӗ, вӗсен ачисем, мăнукӗсем, тăванӗсем те хутшăнса калаçрӗç. С.Т.Ванюковăпа С.Т.Пимуков тата ялти тăватă çын  çинчен 2003 – 2004 çулсенче пичетленнӗ «Чуваши Татарстана» ятлă кӗнекере те çырнă.
Ачасемпе вӗрентекенсен ыйтăвӗсем çине хуравланă май хăнасем  хăйсем çамрăк чухне тытса пынă йăла-йӗрке – Уяв, Учӳк, Мăнкун, Çимӗк – çинчен каласа кăтартрӗç. Лениногорск районӗнчи Çӗнӗ Шешкел тата Самар облаçӗн Шунтал районӗнчи Красный Яр, Чăтăрлă тата Аксаково чăваш ялӗсем ӗлӗкренех туслă пурăннине те аса илчӗç хăнасем. Янравлă купăс сассипе хăнасем чăваш такмакӗсене, уяв юррисене юрласа пачӗç, вальс ташларӗç. Тӗлпулу хаваслă та хавхалануллă иртрӗ.

Çӗнӗ Шешкел шкулӗн
администрацийӗ.
А.Саушкина сăнӳкерчӗкӗ.