Ачине вӗлернӗшӗн 4 çула лартнă

Çуратнă, вӗлернӗ, пăрахнă... Çакăн пек сценарипе пынă Узбекистан çӗршывӗн 29 çулти гражданкин Хусанти преступленийӗ. Çӗр çинчи чи пысăк çылăха тума ăна çитмен пурнăç хистенӗ-мӗн.

Кăçал февраль уйăхӗн 26-мӗшӗнче тетӗшӗ пурăнакан хваттерте вăл пӗр-пӗчченех сывă арçын ача çуратнă та хупласа вӗлернӗ. Преступление пытарас шутпа пепкине алшăллипе чӗркесе целлофан хутаçа хунă, унтан Габишев урамӗнчи пӗр çӳп-çап контейнерне кайса пăрахнă. Çапла майпа ытлашши хырăмран хăтăлнă иккен вăл. Мӗншӗн тесен ачана ӳстерме хал çитереймесрен хăранă. Унăн ку пепкисӗр пуçне алăра тата икӗ пӗчӗк ача иккен, Раççейре вара пурăнма вырăнӗ çук.

Апла-и, капла-и, çитмен пурнăç ăна тӳрре кăлармасть. Хăй çуратнă ачи пулсан та, вӗлернӗшӗн закон умӗнче явап тытмаллах. ТР Следстви комитечӗн пресс-служби пӗлтернӗ тăрăх, Хусанти суд РФ Уголовнăй кодексӗн 106-мӗш статйипе (амăшӗ ачине çуралнă хыççăнах вӗлерни) ăна 4 çула колони-поселение яма приговор йышăннă.