Чак-чак мар, пулă!

Раççейре Конфедерацисен Кубокӗ уçăлнă май, Хусан болельщиксен кăмăлне хальхинче чак-чакпа мар, пулăпа тупма хатӗрленет. Июнӗн 16-22-мӗшӗнче Хусанта «Пулă эрни» пулать. Çапла майпа Тутарстан тӳрех икӗ мулкача тытать: хăйӗн тараватлăхӗпе пуян историне те, республикăра пулă ӗрчетекенсен хуçалăхӗсен ӗçне те кăтартать. Тепӗр тесен, Атăлпа Кама пулли ӗлӗкрен сумра пулнă-ха.

Хусанти чи лайăх ресторансем республикăри шыв-шур пуллисенчен хăйсен рецепчӗсемпе эрнипех пулă шӳпи пӗçереççӗ. Ыран, июнӗн 17-мӗшӗнче, Хусанти «Казан» Çемье центрӗ умӗнче «Фишка» фестиваль пулать. Кунта ирхине 11.30 сехетре 1000 литр пулă шӳрпи пӗçерсе халăха хăналаççӗ. Фестивале паллă шоумен Оскар Кучера ертсе пырать. Пурте килӗр, ӳкӗнмелле пулмасть!