Чи лайăх комбайнер кам?

Кăçалхи çутçанталăк условийӗсене пула вырмана икӗ эрне кая юлса тухнипе тухăçа пухасси сисчӗвлентерчӗ. Çитменнине тата тухăç та нихăçанхинчен вăйлăрах çитӗнчӗ. Çӗр ӗçченӗсен умне лартнă çăмăл мар задачăна пурнăçлама стимул пултăр тесе ТР Президенчӗ чи лайăх 200 комбайнера 100-шер пин тенкӗ преми пама йышăнчӗ. Тав Турра, августăн иккӗмӗш çурри типӗ тăчӗ. Çӗр ӗçченӗсем паянхи кун тӗлне 4 миллион тонна ытла тырра пухса илейрӗç. Çапах та лăпланма вăхăт мар. Акнă тырă ӗлкӗрсе тăкăнать, çанталăк та хăвăртлăха ӳстерме хистет. Паянхи кун тӗлне çӗнӗ тухăçăн 80 процентне пухса илнӗ.

Хальхи вăхăтра вырмана хутшăннă механизаторсем çинчен районсенчен даннăйсем пухнине хыпарлать ТР Ял хуçалăхпа апат-çимӗç министерствин пресс-служби. Ун сăмахӗсем тăрăх, «2017 çулăн чи лайăх комбайнерӗ» конкурс çӗнтерӳçисен претенденчӗсем палăра пуçларӗç.

Реклама

Пӗрремӗш ушкăнра хальлӗхе Лайăш районӗнчи «Г.Б Зарипов» хуçалăх комбайнерӗ Ф. Ахметшин малта. Вăл 21 кунра «Нива СК-5» хир карапӗпе 1764 тонна тырă çапнă. Иккӗмӗш ушкăнра Элмет районӗнчи Н.Е. Токарликов ячӗллӗ АО комбайнерӗ А.Федосеева çитекен çук-ха. «Нью-Холланд ТС-56» комбайнӗпе вăл 27 кунра 3360 тонна тырă çапнă.

Виççӗмӗш ушкăнра Нурлат районӗнчи «А.И.Сулейманов» хуçалăхри В.Никитин малта. Унăн кăтартăвӗ- «Нью Холланд 8080» комбайнпа 33 кунра 4615 тонна. Тăваттăмӗш ушкăнра малти вырăнта Элкел районӗнчи «Хузангаевский» хуçалăх комбайнерӗ Ф.Зайнуллин. 26 кунра вăл «Торум 750» комбайнпа 3222 тонна тырă çапнă.