Елабугăра учительсен фестивалӗ

Паян Елабугăра Учительсен VIII халăхсем хушшинчи фестивалӗ уçăлчӗ. Ăна «Вӗрентӳ пуласлăхӗ е пуласлăх вӗрентӗвӗ» пленарлă ларупа пуçларӗç. Ун ӗçне ТР Патшалăх Канашӗн Председателӗ Фарид Мухаметшин та хутшăнчӗ. Кăçалхи фестиваль Раççейри 410 педагога пухрӗ. Теми «Çӗнӗ ăрăвăн ФГОСӗ - шкул вӗрентӗвӗн методика çӗнелӗвӗ».

Раççей учителӗсен виçӗ куна тăсăлакан фестивалӗн программи анлă: форума учитель-практиксемпе ученăй-специалистсен, ятарлă вăтам тата профессиллӗ аслă шкулсен хушшинчи диалог пек йӗркеленӗ. Ытти çулсенчи пекех учительсем лекцисенче, мастер-классенче, тренингсенче, педагогсен опычӗн презентацийӗсенче пулса курӗç. Культура программи те анлă, Раççей, АПШ, Германи, Израиль, Сингапур, Турци, Словаки Республикин, Азербайджанпа Белоруссин чи лайăх специалисчӗсемпе ученăйӗсем фестивале модератор пек килнӗ. Вӗсенчен пиллӗкӗшӗ «Çулталăк учителӗ» конкурсăн çӗнтерӳçипе лауреачӗ.
Фестивале уçнă çӗре çаплах Анат Кама хулинче пурăнакан тӗлӗнмелле ача, 7 çулти Миша Талерчик та хутшăнчӗ. Миша кăçал пӗрремӗш класа кăна каять-ха, апла пулсан та çын анатомине пӗрремӗш курс студентӗнчен те лайăхрах пӗлет.