Хусан чӗринче гимн ян каять

Хусан чӗрине - Кремле - юлашки вăхăтра чун кӗчӗ тейӗн, кунта хальччен пулман япаласем пулса иртеççӗ: çемье çавăрма шутланисене çырăнтараççӗ, джас фестивалӗ... Августăн 25-26-мӗшӗсенче вара Раççей, Тутарстан гимнӗсем илтӗнӗç. Илтӗнӗç тени тӗрӗс те мар пуль-ха - кӗрлӗç. Раççей, Казахстан тата Турцин 18 оркестрӗ харăсах Раççей, унтан Тутарстан гимнӗсене янратӗ. Çав кунсенче «Хусан Кремлӗ» музей-заповедникра «Хусан фанфарӗсем» фестиваль иртет.

- Фестиваль программи аслисемшӗн те, ачасемшӗн те интереслӗ пулать. Эпир пурне те хăнана чӗнетпӗр. Программăра: концертсем, оркестрсен маршӗсем тата ытти нумай-нумай интересли, - пӗлтерет музей пресс-служби.

Пӗрремӗш хут РФ Оборона министерствин тӗп çар округӗн виçӗ оркестрӗ те пулать. Çаплах Казахстан Республикин Ници гвардин оркестрӗ тата Турци Республикин «Мехтер» çар оркестрӗ килеççӗ. Сăмах май, Осман патшалăхӗнче йӗркеленнӗ «Мехтер» тӗнчери пӗрремӗш çар оркестрӗ шутланать. Вăл хăй вăхăтӗнче ялавшăн яваплă пулнă.

Кунсăр пуçне мероприятие Ульяновскри «Держава», «Элмет» оркестрсем,Чулхулари параппанçăсен тата мажореткăсен ансамблӗсем, Хусанти танк училищин, ТР ШӖМӗн Культура центрӗн, РФ нацгвардин Хусанти 5561-мӗш чаçӗн, Хусанти 13-мӗш музыка училищин ушкăнӗсем тата «Фантазия» джас-оркестр хутшăнаççӗ.