Хусан 3000 000-мӗш туриста кӗтет

2018 çулта Хусан хăйӗн 3 000 000-мӗш туристне кӗтсе илме хатӗрленет, тесе пӗлтернӗ Туризма аталантаракан комитетăн директорӗ Дарья Санникова паян Хусан Ӗçтăвкомӗн ӗçлӗ тунтикунӗнче.

«Эпир кăçал Хусана туристсем килесси 10-15 процента ӳсессе кӗтетпӗр. Тен, ытларах та пулӗ. Футбол енӗпе тӗнче чемпионатне туристсемпе хăнасем питӗ нумай килесса шанатпăр»,- тенӗ вăл кун пирки.

Санникован сăмахӗсем тăрăх, 3000 000-мӗш туриста кӗтсе илмешкӗн ятарлă мероприяти йӗркелӗç. Чăн та, хальлӗхе кун валли мӗн чухлӗ укçа уйăрасси паллă мар-ха. Комитет ертӳçи çаплах 2018 çула республикăра Тараватлăх çулталăкӗ тесен тӗрӗс те актуаллă пулнине каланă. «2017 çулта Хусан Раççейри чи тарават хуласен рейтингӗнче малти вырăнта пулнă. Кăçал чи паллă пулăмсенчен пӗри те «Туризм тата спорт» халăхсен хушшинчи курав шайӗнче «Тараватлă Хусан» сесси пулать. Кунсăр пуçне хулари мӗнпур мероприяти кăçал тараватлăх эгидипе иртет»,- тенӗ.