Малашне канмалли кунсенче эрех ӗçместпӗр

Раççейре малашне канмалли кунсенче лавккасенче эрех сутма чарас шухăш пур. РФ Сывлăх сыхлав министерстви халăха сывă пурнăç йӗркине хăнăхтарас стратегие хатӗрленӗ май çакăн пек сӗнӳпе тухнă.

« Канмалли кунсенче эрех сутма чарни эффективлă мел, ăна пурнăçа мӗнле кӗртмеллине ытти ведомствăсемпе шутлăпăр»,- тенӗ Сывлăх сыхлав министерствин медицина профилактикин центрӗн пресс-служби.

Хальхи вăхăтра стратеги планӗпе ӗçлеççӗ кăна-ха, унтан ведомствăсем хушшинче сӳтсе явӗç те мӗнле майпа çак сӗнӗве пурнăçа кӗртесси пирки шутлӗç.

Сăмах та çук, Раççейре эрех шыв пекех юхать, уйрăмах канмалли кунсенче. Ӗçкӗçе ку мерăсем, паллах, чараймӗç, мӗншӗн тесен вăл эрехне пурпӗр тупать, çапах та çамрăксемшӗн усси пулатех. Яш-кӗрӗм сăра кӗленчи йăтса урам тăрăх утма чарăнчӗ пулсан, эрехсӗр канма та хăнăхса çитӗ.