Петрпа Феврони палăкне ăçта лартасси паллă

Хусанта Чистопольская урамӗнче вырнаçнă Хусан митрополичӗ, Çветтуй асапçă Кирилл ячӗллӗ храм чăвашсемшӗн ют мар, настоятелӗ Игнатий архимандрит чăваш пулнăран нумайăшӗ ăна чăваш чиркӗвӗ пек йышăнать. Паллах, кӗлӗсене кунта тăван чӗлхепе те илтме пулать.

Çак кунсенче ТР Культура министерствин ларăвӗнче Петрпа Феврония Муромский çветтуйсен палăкне çак чиркӗвӗн территорине лартма йышăну тунă. Чăн та, проекта пуçаракансем чăвашсем мар, ТР Вырăс наципе культура пӗрлешӗвӗ. Вӗсем ку проекта пӗлтӗр Вырăс чӗлхи кунӗнче ТР Президентне Р. Минниханова кăтартнăччӗ. Республика ертӳçи çак палăка лартас ыйтăва пăхса тухма хушу панăччӗ. Хусан чиновникӗсемпе Хусан Митрополийӗ тинех палăка лартмалли вырăна палăртрӗç. Хусан тата Тутарстан митрополичӗ Феофан храмăн карти çине панно, ăна скульптурăн фонӗ тăвӗç, вырнаçтарма ирӗк панă. Çаплах каçхине палăка çутатма подсветка та вырнаçтарӗç. (А.Наумов сăнӳкерчӗкӗ).