Турă калашле, виççӗ, эппин, ăнмаллах!

Хусан тата Тутарстан митрополичӗ Феофан та Раççейпе Мексика сбрнăйӗсем мӗнле вылянине курма «Казань-Арена» стадиона каять. Кун çинчен вăл июнӗн 23-мӗшӗнче журналистсемпе тӗл пулсан пӗлтерчӗ. «Ыран сирӗн çӗнтермеллех!» - чӗнсе каларӗ вăл Раççей футболисчӗсене. Конфедераци Кубокӗн Хусанта иртекен виççӗмӗш вăййи ку. Июнӗн 18-мӗшӗнче Португалипе Мексика, 22-мӗшӗнче Германипе Чили сборнăйӗсем вылянăччӗ. Турă калашле, виççӗ, эппин, пире ăнмаллах! Владыко та болельщиксен шутӗнче пулсан, пушшех те.

Сăмах май, Феофан митрополитăн пурнăçӗ футболпа тӳрремӗнех çыхăннă иккен. Кун çинчен вăл пресс-конференцире çапла пӗлтерчӗ:

- Ман биографипе паллашнисем пӗлеççӗ пулӗ ӗнтӗ. Пурнăçăм футболпа тӳрремӗнех çыхăннă ман. Нумай çул Аргентинăра ӗçлерӗм. Унта вăт, арçын ача çуралсан ăна чи малтан футбол мечӗкӗ тыттараççӗ. Футбол Раççей вăййи мар-ха ӗнтӗ, çапах та пурпӗр илемлӗ,- терӗ вăл.