Вӗлле хурчӗсем В.Путинран пулăшу кӗтеççӗ

Кун пекки юлашки çулсенче пулманччӗ-ха, Раççейре вӗлле хурчӗсем те çӗршыв ертӳçинчен пулăшу кӗтеççӗ. Çумăрлă çанталăка пула вӗсем кăçал çителӗклӗ пыл пуçтараймаççӗ иккен. Шӳтлемесӗр каласан вара, специалистсем ку енӗпе лару-тăру çӗршывӗпех питӗ япăххине калаççӗ. Пыл илесси темиçе хут чакнисӗр пуçне вӗлле хурчӗсем хăйсене те тăрантарайманнипе вилес хăрушлăх пысăк. Çавăнпа утарçăсем пухнă пыла кăçал вӗлле хурчӗсене хăйсене хӗл каçа çиме хăварӗç.

Çакăн пек лару-тăрăва пула Раççейри Утарçăсен канашӗ РФ Президентӗнчен В.Путинран отрасле пулăшма ыйтасшăн, тесе пӗлтерет «Татар-информ» ИА «Известия» хаçат çине таянса.

Паллах, ку пыл хакӗ çине те витӗм памасăр пултараймӗ. Пылак кучченеç халех 50 процента ӳсме ӗлкӗрнӗ-мӗн. Юрать-ха, пылăн срокӗ тухмасть, запасра пӗлтӗрхи пур-тăк, питех аптăрамăпăр текен шухăш лăплантарать.