Ыран Раççей Мексикăпа вылять

Июнӗн 24-мӗшӗнче, Хусанта Раççей сборнăйӗ Мексикăпа тӗл пулать. Матч каçхине 18 сехетре пуçланать. Куракансене «Хусан-Арена» стадиона вăйă пуçланиччен виçӗ сехет маларах килмеллине асăрхаттаратпăр. Çапла майпа тӗрӗслевре вăхăтăра та нумай ирттерместӗр, Конфедераци Кубокӗн партнерӗсем хатӗрленӗ мероприятисене хутшăнма ӗлкӗретӗр тата мӗн чухлӗ хăнасемпе паллашма пултаратăр.

Матч вăхăтӗнче ытти чухнехи пекех хальхинче те хăрушсăрлăх йӗркине пăхăнмалла. Хăвăрпа пӗрле нимӗнле пиротехника хатӗрне, кӗленче контейнерсемпе ытти савăтсене, çав шутра духипе пудрăна та, термоссене, самокатпа ролик пек спорт япалисене, селфи-патаксене, штативсене, хуçлатсан та 25 сантиметр вăрăмрах зонтсене илсе кӗме юрамасть. Конфедераци матчӗсен вăхăтӗнче обществăлла транспорт мӗнле çӳренине sntat.ru сайтра пӗлме пулать.