Хусанпа Сăр чиккисене чавакансен йывăр шăпине сăнарланă кăларăм
2021 çул Чăваш Республикинче Хусан тата Сăр хÿтĕлев чиккисене тăвакансене халалланă çулталăк пулчĕ. Çулталăкĕпех тĕлпулусем, тĕрлĕ мероприяти иртрĕ. Владислав Николаев пултаруллă çыравçăн черетлĕ ал çырăвĕ те кĕнекен пичетленчĕ, «Сăр хĕрринче çĕнтерĕве туптанă» ятлă вăл. Кăларăм Чăваш кĕнеке издательствинче пичетленчĕ. Унăн ал çырăвĕ ачасемпе çамрăксем валли чăвашла çырнă произведенисен 2021 çулхи конкурсĕнче çĕнтернĕ. Конкурса Чăваш Республикин Министрсен Кабинечĕ 2011 çулхи июнĕн 16-мĕшĕнче йышăннă постановленипе килĕшÿллĕн йĕркеленĕ. Кăларăма вăтам çулти ачасем валли хатĕрленĕ, вăл виçĕ пайран тăрать.
