Кӗмӗл саслă юрăç кăçал пирӗн Ксения Захарова!

Хальхинче фестиваль-конкурса Раççейри 6 регионтан тата Чăваш Енри 8 районтан пурӗ 30 çамрăк юрăç хутшăннине пӗлтерет Конгресс сайчӗ. «Кӗмӗл сасса» Тутарстанри çамрăк юрăçсем каймасăр пӗр çул та юлмаççӗ. Пӗлтӗр хисеплӗ 1-мӗш вырăна Вера Кожеманова йышăннăччӗ. Кăçал вара пирӗннисем икӗ юрăçпа икӗ ансамбль хăйсен пултарулăхне кăтартнă. Сăмах май, жюри конкурсантсен чӗрӗ саспа тӗрӗс юрлас ăсталăхӗсӗр пуçне сцена çинче хăйсене мӗнле тытма пӗлнине те хакланă.

20-мӗш, юбилейлă конкурс пирӗннисемшӗн питӗ ăнăçлă пулнине савăнса пӗлтеретпӗр. Ушкăнпа юрлакансен хушшинче 3-мӗш вырăна Ольга Суриковăпа Дмитрий Никитин (Çарăмсан районӗ), 1-мӗш вырăна Нурлатри «Илемпи» ушкăн йышăнчӗç. Кунсăр пуçне Ольга Сурикова Сургут хулинчи  Кристина Лебедевăпа тата Чăваш Енри Хӗрлӗ Чутай районӗнчи Татьяна Зарубинăпа пӗрле дипломант пулса тăнă.

Чăваш юррин кăçалхи «Кӗмӗл сасси» вара Çӗпрел районӗнчи Кивӗ Çӗпрел пики, Шупашкарти  музыка училищинче вӗренекен Ксения Захарова. Шăпах вăл тивӗçнӗ те Гран-прие. Саламлатпăр! Çӗнтерӳçӗ-юрăçса ЧНК президенчӗ Николай Угаслов ноутбук парнеленӗ, Конгресăн ыркăмăллăх фончӗн ертӳçи Павел Вязов ятарлă парне – гитара панă.

1-мӗш вырăна  Шупашкарти Людмила Засыпкина, 2-мӗш –  Санкт- Петербургри Наталия Васильев,  3-мӗш Ульяновск облаçӗнчи Аслă Нагаткин пики Кристина Никитина йышăннă. (З. Яковлева сăнӳкерчӗкӗсем).