Çамрăкрах чухне Аркадий Русаков çыравçа юрату, кăмăл-сипет, çутçанталăк темисем кăсăклантарнă пулсан халӗ истори ыйтăвӗсемпе халăх кун-çулӗ ытларах пăшăрхантараççӗ

Аркадий Русаков 1989 çултанпа Стерлитамакри çыравçăсен организацийӗн «Шуратăл» литература пӗрлешӗвӗнче тăрать. 2007 çултанпа – РФ тата ЧР Писательсен союзӗсен пайташӗ. Вăл чăвашла та, вырăсла та çырать. Унăн произведенийӗсем тӗрлӗ хаçат-журналта та, уйрăм кӗнекен те тухаççӗ. Çамрăкрах чухне çыравçа юрату, кăмăл-сипет, çутçанталăк темисем кăсăклантарнă пулсан халӗ истори ыйтăвӗсемпе халăх кун-çулӗ ытларах пăшăрхантараççӗ, çӗнӗ калав-повесть çырма хистеççӗ. Чăваш кӗнеке издательствинче унăн «Чикӗри тӗлпулу» тата «Эпир кунта хӗçпе килмен» кăларăмӗсем пичетленнӗ.

– Мӗн вăл сирӗншӗн литература?
– Литература маншăн – чун канăçӗ.
– Мӗн хавхалантарать сире çырма?
– Чунри туртăм.
– Юратнă поэт, прозаик.
– Константин Иванов, Юхма Мишши.
– Юратнă кӗнеке.
– «Нарспи» (Константин Иванов).
– Май пулнă-тăк, мӗнле çыравçăпа тӗл пулса калаçнă пулăттăр тата мӗншӗн шăпах унпа?
– Валери Туркайпа, анчах эпӗ унпа калаçса курман.
– Пурнăç девизӗ.
– Тăвалла пулсан та – малалла.
– Хайлава çырса пӗтерсенех унпа чи малтанах кама паллаштаратăр? Камăн сӗнӗвӗ сирӗншӗн пысăк пӗлтерӗшлӗ?
– Мăшăра паллаштаратăп. Ахаль çынсем каланине тата пысăк авторитетлă çыравçăсен сăмахне итлетӗп.

Ольга ИВАНОВА хатӗрленӗ.
Автор сăнӳкерчӗкӗ.