Цифра технологийӗсем садикре те, шкулта та

Вӗрентӳри цифра технологийӗсене тишкернӗ май, çак секцин ӗçне хутшăнакансем вӗрентӳ организацийӗсене квалификациллӗ ИТ-специалистемпе (системлă администраторсем, информаци хăрушсăрлăхӗн специалисчӗсем) тивӗçтерессине пăхса тухма тата ӗç паракансене ӗçлекенсем валли ачасен информаци хăрушсăрлăхӗ çинчен ăнлантаракан базăллă курссем йӗркелеме, çавăн пекех цифра транформацийӗпе граждан служащийӗсен квалификацине ӳстерекен курссемпе квотăна ӳстерме сӗнчӗç.

Аталанăвăн çӗнӗ картлашки çине хăпарас тесен пирӗн информацие хӳтӗлекен техника тата программăллă хатӗрсене туса кăларассине хăвăртлатмалла, виртуаллă чăнлăх никӗсӗнче вӗрентӳ процесӗ валли информаци технологиллӗ йышăнусене хатӗрлемелле. Тӗллевсем лайăх, хăшӗ-пӗр çӗнӗлӗх пурнăçа кӗрсе те пырать.

Цифровизаци çулталăкӗ шкулсемпе ача сачӗсене те çитни сисӗнет. Çак эрне пуçламăшӗнче эпир Халăхсен Ассамблеин Канашӗн ларăвне хутшăнкансемпе пӗрле Лайăш хулинчи ача сачӗсемпе шкулсенче пулса куртăмăр.

Математикăна е физикăна кăна мар, тăван чӗлхене вӗреннӗ чухне те ачасем интерактивлă доскапа усă кураççӗ. Урок вăхăтӗнче вӗсем  интернета та тухма пултараççӗ, презентацисем хатӗрлсе кăтартма та, ытти классемпе тӳрӗ çыхăнăва тухма та. Чи кирли – вӗренекенсем тăван чӗлхене вӗренме класа васкани. Çакăн пек 20 доскана кăçал ТР Президенчӗ Уявра ятарласа республикăри чăваш шкулӗсене парнелерӗ. Рустам Минниханов Правительство çуртӗнчи канашлура «Чăваш ачин чăвашла пӗлмелле!», – тесе каланă видеоролик социаллă сетьсемпе ӗнтӗ çулталăка яхăн çӳрет. Чăваш ашшӗ-амăшӗсемшӗн ку лайăх кăтарту материалӗ. Унпа учительсен те «хӗçпăшаллансан» юрать.

Лайăшри 2№ шкулта ытларах вырăс чӗлхипе вӗрентеççӗ пулсан, воспитани мероприятийӗсем икӗ чӗлхепе пыраççӗ. Культурăсене илес-тӗк, шкулта таджик, армян, чăваш, азербайджан этеплӗхӗсене тӗпчеççӗ. Юрă-ташăпа çеç мар, флейтăпа, клавесинпа кӗвӗ кăларса та, çемье династийӗсене шыраса та. Вӗренекенсем грантсене, конкурссене хутшăнаççӗ, вӗсенче çӗнтереççӗ те. Çак шкул цифра технологийӗсене тӗпе хурса «Ӳсӗм вырăнӗ» программăпа ӗçлени, кунта «Юнармия» уйрăмӗ пулни – унăн вӗренекенӗсен пӗлӳ тата хатӗрленӳ шайне çӳле хăпартма пулăшать. ​

Лайăшри искусствосен шкулӗнче «Все сначала» ятлă ташă коллективӗ пур. Кăçал çуркунне вăл «Созвездие Йолдызлык» фестивальте чăваш ташшине ташласа виççӗмӗш вырăн йышăннă. Ачасене ташлама вӗрентекен Миляуша Зарифуллина пӗлтернӗ тăрăх, лайăшсем лартнă ташă «Акатуй» – тӳрех жюри кăмăлне кайнă. Коллективра чăвашла пӗлекен пачах та çук, вӗрентекенӗ те чăваш мар, çапах пӗрин хыççăн тепри Халăхсен пӗрлӗхӗн тата Культура еткерлӗхӗн çулталăкӗсем пулни – çакăн пек результат патне илсе çитернӗ.

Республикăра Цифровизаци çулталăкӗ пулни ача сачӗсен ӗçӗ çине те витӗм кӳрет. Хула варринче вырнаçнă шкул умӗнхи пӗлӳ паракан «Пилешӗм» вӗрентӳ учрежденийӗ çиччӗмӗш çул ӗçлет. ​ Унăн заведующийӗ Ирина Бикмиева пӗлтернӗ тăрăх, хальхи ачасене гаджетсемпе усă курма вӗрентмелле мар, вӗсем хăйсем сана вӗрентме пултараççӗ. Çапах тӗтелти лайăххипе начаррине уйăрса илме садикрах вӗрентни – питӗ пӗлтерӗшлӗ япала. Персоналлă даннăйсене хӳтӗлесси те юлашки вырăнта мар. Пӗчӗккисем тунă ӳкерчӗкӗсене, ачасен сăнӳкерчӗкӗсене воспитательсем QR-кодпа çыхăнтарса интернета вырнаçтараççӗ, кодне ашшӗ-амăшӗсене ярса параççӗ. Ют çын вӗсемпе усă кураймасть. Ача садӗнчи тепӗр япала та хăнасене тӗлӗнтерчӗ. Гранта хутшăнса «Пилешӗм» ачасем валли тренажерсем, моторикăна аталантаракан кăткăс вăйă хатӗрӗсем туяннă. Кунти воспитанниксем садикран ГТО нормативӗсене парса тухаççӗ. Çак ӗçе юлашки вăхăтчен районта Лайăшри чăваш наципе культура центрӗн ертӳçи Владислав Егоров ертсе пынă. Пӗчӗкренех çитӗнӳсем тăвакансем шкулта та хастар.