Гран-при — Элкеле!

Ку ыттисемшӗн тӗслӗх пуласса, Тутарстанăн тӗрлӗ кӗтесӗнче чăваш ачисемпе ӗçлекен ентешӗмӗрсем çитес конкурса тата йышлăнрах хутшăнасса шанатпăр.

Элкел районӗнчи Пасарлă Матак ялӗнчи «Берёзка» ача садӗнче логопед-педагог пулса ӗçлет Наталья Михайловна Коновалова. Эпир унран ӗçӗ çинчен каласа пама ыйтрăмăр. 

— Эпӗ ачасен калаçăвне лартатăп, чăвашла калаçăвăн сассисене кăларассипе те ӗçлетӗп. Малтан ачана тăван чӗлхипе калаçма сасăсем лартатăп, кайран — вырăс чӗлхипе. Калаçас енӗпе пултарулăхне тăван чӗлхипе уçтăр тетӗп. 
— Ашшӗ-амăшӗ хирӗç мар-и?
— Пачах урăхла. «Эпир килте чăвашла таса калаçаймастпăр, вырăсла калаçни те пулать», — тесе ачине чăвашла тӗрӗс калаçма вӗрентме ыйтаççӗ.
— Миçе çул ӗçлетӗр ачасемпе?
— Педагог стажӗ 18 çул, 12 çул логопед пулса ӗçлетӗп. Малтан учительте, халь пӗчӗккисемпе.
— Ачасем çинчен каласа парăр, мӗнле ачасем халь?
— Ачасем лайăх, пултаруллă. Тăрăшаççӗ. Мана хăйсем пулăшаççӗ, калăн, мӗн кирлине систереççӗ. Хальхи ачасене телефон интереслентерет, кӗнекесем юратмаççӗ. Çавăнпа та хамăн мастер-класра ачасене мӗнле майпа тимлӗхе хăнăхтарассине каласа патăм. Тӗслӗхрен, хутран тунă япаласемпе кăсăклантарма пулать. 
— Сирӗн ушкăнра ачасем нумай-и?
— Чылайăшӗ шкула кайрӗç, халӗ чăваш ачисем виççӗн. Чăваш ялӗсенчен илсе çӳрекенсем пур (ялсенче логопед çук-çке).
— Садикре ытти халăх ачисем те пур пулӗ, вӗсене те тăван чӗлхипех «калаçма» вӗрентетӗр-и?
— Вырăс, тутар ачисем çӳреççӗ садике. Кашнине тăван чӗлхипе сасă лартатăп малтан. Тутар чӗлхинчи сасăсене лартнă чух тутар чӗлхине вӗрентекен ӗçтеш пулăшать. 
— Наталья Михайловна, паян Гран-при çӗнсе илни сирӗншӗн мӗнле пӗлтерӗшлӗ?
— Халь ăнлансах пӗтерейместӗп, эмоцисем пит нумай. Çӗнтерӗп тесе шутламан та. Ку конкурса хатӗрленнӗ чух халиччен пӗлмен япаласене пӗлтӗм. Нумайăшне аслă çулсенчи çынсенчен ыйтмалла пулчӗ, хăшне-тӗр библиотекăра, интернетра шыраса тупрăм. Пирӗн хамăрăн чӗлхене пӗлмелле, пӗчӗкрен пӗлмелле. Кун çинчен эпӗ ашшӗ-амăшӗсене аса илтерсех тăратăп.

Татьяна ВАСИЛЬЕВА.
Автор сăнӳкерчӗкӗ.