Кивтимушкелсем «Сайяр» конкурсра çӗнтернӗ

Кăçал фестиваль 13-мӗш хут ирт­рӗ. Ачасем театр постановкисене тутар, чăваш, удмурт тата мари чӗлхисемпе лартнă. Шкулсенчи тапхăр январьте, муниципалли – февральте, зонăри апрельте пулчӗ. Куçăн мар тапхăра хальхинче 45 районтан 530 коллектив хутшăннă. Чи лайăх 60 коллектива чыслав церемонине чӗнсе илнӗ. Сума тивӗçнисен хушшинче чăвашсем те йышлăнччӗ кăçал. Акă, тӗслӗхрен, Аксу районӗнчи Кивӗ Тимушкел шкулӗнчи «Асамат кӗперӗ» театр студине (ертӳçи Елена Васильевна Кожеманова) кăна илер. Çамрăк артистсем ывăлӗсене вăрçа ăсатса каялла кӗтсе илеймен амăшӗн историне каласа паракан чăвашла сценка лартса жюри пайташӗсене тыткăнланă, 3-мӗш вырăн йышăннă, 50 пин тенкӗлӗх сертификата тивӗçнӗ. 

Маттурсем, саламлатпăр!

Вера АЛЕКСАНДРОВА.

Сăнӳкерчӗк ТР Вӗрентӳпе 

наука министерствин 

пресс-службин.