Нумай ачаллисене каялла тавӑрӗҫ

Ҫакнашкал кашни тӗслӗхе Патшалӑх Думин депутачӗсем тимлесе тӑрӗҫ. Ҫакӑн ҫинчен журналистсене РФ Патшалӑх Думине Тутарстанран суйланнӑ депутат Айрат Фаррахов пӗлтернӗ.
Ун сӑмахӗсемпе, кун пирки РФ Оборона министерствин представителӗ Думӑна килсе пӗлтернӗ. Фаррахов аса илтернӗ тӑрӑх, РФ Генштабӗн хушӑвӗ тӑрӑх, октябрӗн 4-мӗшӗнчен Тутарстанра 3 ҫул ҫитмен ача ашшӗсене мобилизаципе ҫар ретне йыхӑрмаҫҫӗ.
"Октябрӗн 4-мӗшӗччен мобилизациленӗ ҫак категорие кӗрекен граждансене килӗсене тавӑрасси пирки Оборна министерстви йышӑну тӑвӗ", – тенӗ Фаррахов.
Вӑл палӑртнӑ тӑрӑх, ҫак ыйту граждансене хумхантарнӑ, ҫавӑнпа та депутатсем Патшалӑх Думин председателӗпе Вячеслав Володинпа ӑна ҫар ведомствин представителӗсем умӗнче тӗлпулу вӑхӑтӗнче тӑратнӑ.
"Оборона министерствинче депутатсене ҫак ыйтӑва тимлесе тӑма ыйтрӗҫ. Ман пата граждансем те нумай ҫыраҫҫӗ. Эпир кашни обращенипе ӗҫлетпӗр", - пӗтӗмлетнӗ депутат.
Аса илтеретпӗр, Володин пӗлтернӗ тӑрӑх, ӗнерхи куна Раҫҫейри 9500 нумай ачаллӑ аттесене ҫар чаҫӗсенчен ҫемйисене тавӑрнӑ.