Хусанти Туслăх Çуртӗнче чăваш ёлки иртрӗ

Пухăннисене ТР Халăхсен ассамблейин Ӗçтăвкомӗн ертӳçипе К. Г. Яковлевпа «Сувар» хаçатăн тӗп редакторӗ, ТР ЧНКА çумӗнчи Чăваш çыравçисен союзӗн председателӗ И. Ф. Трифонова çывхарса килекен Çӗнӗ çул ячӗпе саламларӗç, çирӗп сывлăх, телей, Çӗнӗ çул ыррине кăна илсе килтӗр тесе сунчӗç. 

Хусанти Нумай нациллӗ вырсарни шкулӗн чăваш уйрăмне çӳрекен ачасемпе вӗсен ашшӗ-амăшӗсем, ТР Чăваш хӗрарăмӗсен союзӗн тата чăваш çамрăкӗсен «Аталан» пӗрлешӗвӗн хастарӗсем хатӗрленӗ уяв сценарийӗ питӗ интереслӗ пулчӗ, ăна Сильвия Чаркина йӗркелесе ертсе пычӗ. Уяв пуçлансанах юмах тӗнчине лекрӗç ачасем. Çӗнӗ çулпа (Дмитрий Мясников) Гоша аçтаха (Альбина Шейлан) ачасемпе кам хăш уйăхра çуралнине кура ячӗсене калаттарса паллашрӗç: пӗри уйăх ятне вырăсла калать, тепри — чăвашла. Унтан ачасене ташлаттарса та илчӗç. 

«Хӗл Мучи! Хӗл Мучи!» — часрах Çӗнӗ çулăн тӗп хăнине курасшăн кăшкăраççӗ ачасем. Анчах пӗлетпӗр, Хӗл Мучие уява çитме ялан мӗн-тӗр кансӗрлет. Чăваш ачисен ёлкине те тӳрех çитеймерӗ шур сухаллă асатте. Вăл çитиччен ачасене Юрпике (Светлана Гордеева), Кузя хӗртсурт (Семен Леонтьев), Тухатмăш карчăк (Вера Юнусова) тата Вут кайăк (Альбина Васильева) йăпатрӗç, выляттарчӗç. 

Уявăн хăйнеевӗрлӗхӗ малтан пуçласа вӗçне çитичченех — ачасене май пур таран чăвашла ăнлавсемпе усă курса çӗнӗ сăмахсем вӗрентессиччӗ. Çăвар карсах итлерӗç, вăйăсене хутшăнчӗç, юрларӗç те ташларӗç ачасем. Хӗл Мучи (Евгений Турхан) килсен ăна черет тăрсах чăвашла сăвăсем каласа пачӗç. Хусан чăвашӗсен ачисен хушшинче музыка шкулӗнче вӗренекенсем те нумай-мӗн — фортепианăпа, сӗрме купăспа калакансем те пулчӗç. Паллах, уява килнӗ кашни ачах Хӗл Мучи парнине тивӗçрӗ. 

Тулли кăмăлпа саланчӗç Хусанти чăваш ачисем ёлкăран. Нумайăшӗн Нумай нациллӗ вырсарни шкулӗн чăваш уйрăмне çӳреме тытăнас кăмăл çуралчӗ.

Автор сăнӳкерчӗкӗсем.