Вӗсемшӗн хавхалану çăлкуçӗ – Тăхăрьял тавралăхӗ, халăхӗ, тăван чӗлхе илемӗ...
«Кашлатăр Иванов вăрманӗ!..» Чăваш халăх поэчӗ Ухсай Яккăвӗ çапла каланă. Вăл Пушкăртстанри Пелепей районӗнчи Слакпуçӗнче çуралса ӳснӗ, кунта сипетлӗ вăй илнӗ, чăваш поэзийӗнче юратнă пиччӗш –Константин Иванов – пекех вилӗмсӗр йӗр хăварнă. Çулсем иртнӗçемӗн çав сăмахсен асамлăхне ытларах та ытларах та ăнланса пыратăп пек. Вăрманӗ кунта – поэзи ӗнтӗ, сăвă-поэма вара сăмах ӳнерӗнче чи малта. Тем каласан та, поэзи чăваш литературинче ытти жанрсен ретӗнче чаплăрах та, сумлăрах та курăнать. Писательсенчен ытларахăшӗ, тен, пурте тенӗ пекех, çырас ăсталăха сăвă хайлассинчен пуçланă.
