Хуларисене юрас тесе Питрава 14-мӗшӗнче ирттерчӗç

Çӗпрел районӗнчи Çӗнӗ Шăхаль çын шучӗпе мухтанаймасть, анчах та 100 яхăн çуртлă ял çыннисем питӗ те туслă. 2012 çултанпа кунта Питрав кунне анлăн паллă тăваççӗ.

Престол праçникне кӳршӗ ялсене те пӗрле Чăнлă хӗррине савăнма чӗнеççӗ çӗншăхальсем. Ял вӗçӗнчи илемлӗ вырăнта уяв тумали инфраструктура йăлтах хатӗр. Футбол площадки те пур, волейбол сеткине те карнă, саксем те вырнаçтарса тухнă, капăрлатнă сцена та артистсене кӗтет. Хуларисем нумайăшӗ килесшӗн пулнипе уява июнӗн 12-мӗшӗнче мар, 14-мӗшӗнче, шăматкун ирттерчӗç.