Йывăçăн утмăл тăхăр турат
Аксу районӗнчи Унтакшă ялӗнчи ватăсенчен чи асли - пирӗн анне Анисия Гавриловна Антонова. 1921 çулта нумай ачаллă çемьере çуралса ӳснӗ. Шкулта 4 класс анчах вӗреннӗ. Малалла вӗренме май пулманнипе шкула пăрахма тӳр килнӗ унăн. Мӗн пӗчӗкрен хирте ӗçленӗ. Пурнăçӗ вăл вăхăтра пит йывăр пулнă, тумтир тавраш та çитмен. Вăйӗ çитнӗ...
Аксу районӗнчи Унтакшă ялӗнчи ватăсенчен чи асли - пирӗн анне Анисия Гавриловна Антонова. 1921 çулта нумай ачаллă çемьере çуралса ӳснӗ. Шкулта 4 класс анчах вӗреннӗ. Малалла вӗренме май пулманнипе шкула пăрахма тӳр килнӗ унăн. Мӗн пӗчӗкрен хирте ӗçленӗ. Пурнăçӗ вăл вăхăтра пит йывăр пулнă, тумтир тавраш та çитмен. Вăйӗ çитнӗ таран колхозра тӗрлӗ ӗçсенче тăрăшнă. Çамрăклах тата тепӗр инкек пулса тухнă - колхозра кӗлте çапнă чухне куçне амантнă. Çав куçӗ курми пулнă.
Вăрçăччен аттепе анне мăшăрланса пӗрле пурăнма тытăнаççӗ. Нумаях та вăхăт иртмест аттене вăрçа илсе каяççӗ. Вăл унта урине амантса таврăнать. Çапла пирӗн аттепе аннен тăватă хӗр те пилӗк ывăл çуралать. Пире ура çине тăратса çын тăвиччен мӗн чуль куç хупман-ши вӗсем?
Аттепе анне нихăçан та ӗçсӗр ларман, карта тулли чăх-чӗп, ӗне-сурăх усранă. Атте ял арманӗнче çăнăх авăртнă. Ачисем мăшăрланса хăйсем çурт-йӗр çавăрнă. 1993 çулта атте, вăрçă ветеранӗ, 68 çула çитсен çӗре кӗчӗ. Аннене çав инкек хыççăн пурăнма çăмăлах пулман. Çывăрмасăр çăм арланă, çыхнă, яшки-çăкăрне пӗçернӗ, ӗçрен те юлман.
Кăçал хӗле кӗрсен хисеплӗ, юратнă аннемӗре пӗтӗм çемье, тăвансем тата кӳршӗсем пысăк юбилейпе, 95 çул тултарнă ятпа, саламларăмăр. Ырлăх-сывлăх тата нумай çул пире савăнтарса пурăнма вăй-хал сунатпăр.
Аннен çемйи пысăк, унăн ачисемсӗр пуçне паянхи кун 29 мăнук, 37 кӗçӗн мăнук тата 4 кӗçӗн мăнукӗн ачисем.
